Бир гуруҳ журналистлар Россия ҳукуматининг “Россия Федерациясининг Беларусь йўналишидаги стратегик мақсадлари” номли ички ҳужжатни қўлга киритди. Ҳужжатга кўра, Кремл 2030 йилгача Беларуснинг сиёсати, иқтисодиёти ва ҳарбий салоҳиятини тўлиқ назоратга олишни режалаштирмоқда. Бу ҳақда “Досе” маркази хабар берди. Суриштирувда ушбу марказдан ташқари Süddeutsche Zeitung, WDR, NDR, Yahoo News, Delfi Eesti, Expressen ва Independent нашрлари, ВSquare ва Fronstory лойиҳалари ҳамда Беларусь суриштирув маркази иштирок этган.
Режа 2021 йилда ишлаб чиқилган. Ҳужжатда Россия расмийларининг Беларусдаги сиёсий, мудофаа, савдо ва ижтимоий мақсадлари баён этилган 17 та саҳифа мавжуд. Улар қисқа муддатли (2022 йилгача), ўрта муддатли (2025 йилгача) ва узоқ муддатли (2030 йилгача) даврларга бўлинади.
Шундай қилиб, 2030 йилга келиб, Россия ҳукумати Беларусь қонунчилигини рус тилига мослаштиришни, республиканинг ташқи сиёсатини назорат қилишни ва уни RF манфаатларига мувофиқ бошқаришни, мамлакатда ҳарбий иштирокини кенгайтиришни, Россия ОАВлари сонини кўпайтириш орқали ахборот маконини бўйсундириш, рус тилининг Беларусь тилидан устунлигига эришиш, шунингдек, “интеграциядан манфаатдор руслар қатламини яратиш учун” Беларусь фуқароларига Россия паспортларини беришнинг соддалаштирилган тартибини жорий этишни режалаштирмоқда.
Бундан ташқари, Россия ҳукумати Беларуснинг илм-фан ва таълими орқали ўз таъсирини ёйишни кутган. Айнан шу мақсадда бутун мамлакат бўйлаб Россиянинг “Ягона давлат имтиҳони”ни топшириш пунктларини очиш, шунингдек, Беларуснинг Могилев, Гродно ва Витебске шаҳарларида бир нечта фан ва маданият марказларини яратиш режалаштирилганди.
Суриштирувга кўра, Россия ҳукумати ўз режаларини, жумладан 1999 йилда Россия ва Беларусь раҳбарияти томонидан имзоланган Иттифоқ давлати тўғрисидаги шартнома орқали амалга оширмоқчи бўлган. Бу борадаги музокаралар йигирма йил давом этди. 2019 йилда мамлакатлар пул-кредит сиёсати ва солиқ қонунчилигини уйғунлаштириш каби иқтисодий масалаларга оид 28 та иттифоқ дастури бўйича келишиб олгани эълон қилинди.
Таъкидланишича, режани ишлаб чиқишда РФ Қуролли кучлари Бош штаби, Бош разведка бошқармаси (ГРУ), Ташқи разведка хизмати (СВР), Федерал хавсизлик хизмати (ФСБ) ходимлари ва президент маъмуриятидан Алексей Филатов бошчилигидаги президентнинг чегара бўйича ҳамкорлик бўлими ходимлари иштирок этган. Филатов Жанубий Осетия ва Абхазияда Кремл манфаатларини ҳимоя қилган, шунингдек, ўзини ўзи республика деб эълон қилган Донецк ва Луганск билан гуманитар ва сиёсий ҳамкорликни назорат қилган шахс ҳисобланади, дея қайд этди “Досе” маркази.
Журналистлар ҳужжатни ташқи экспертларга кўрсатди, улар бу ҳужжат ишончли кўринаётгани ва жиддий қабул қилиниши кераклигини тасдиқлади. Хусусан, Европада хавфсизлик ва ҳамкорлик ташкилотидаги АҚШ элчиси Майкл Карпентер шундай фикр билдирди: “Россиянинг Беларусга нисбатан мақсадлари Украинага нисбатан мақсадлари билан бир хил, фақат Беларусда Россия урушга эмас, мажбурлашга таянади”, — дейди у.
Изоҳ (0)