Ўзбекистонда 2023 йил 1 майдан бошлаб компаниялар ва якка тартибдаги тадбиркорлар учун банк ҳисобварақаларини фаолияти давомида ҳам масофадан туриб очишга рухсат берилади. Бу ҳақда Марказий банк хабар бермоқда.
Маълум бўлишича, Марказий банк томонидан ишлаб чиқилган “Банк ҳисобварақларини очиш, юритиш ва ёпиш тартиби тўғрисида”ги йўриқнома Адлия вазирлигида рўйхатдан ўтказилди.
Мазкур ҳужжат банк ҳисобварақаларини очишда бир қанча ўзгаришларни ўз ичига олади.
Жумладан, таъсисчилари Ўзбекистон резидентлари бўлган компаниялар ҳамда якка тартибдаги тардбиркорларга банк ҳисобварақларини 2023 йил 1 майдан бошлаб, нафақат давлат рўйхатидан ўтиш жараёнида, балки фаолияти давомида ҳам банк ҳисобварақларини масофадан туриб очишга рухсат берилади.
Бундан ташқари, ҳисобварақни очиш учун тақдим этиладиган ҳужжатларни электрон сақлаш имконияти бўлганда, қоғозда сақламаслик ҳуқуқи берилмоқда. Ногиронлиги бўлган шахсларга эса факсимил имзодан фойдаланишга рухсат берилади.
Шунингдек, ғазна ижроси билан қамраб олинган компанияларга асосий ҳисобварақ очмасдан, бошқа ҳисобварақлар (транзит, терминал, нақд пул учун, корпоратив карта) очиш мумкинлиги белгиланмоқда.
Ўзбекистон фуқароси бўлгамаган жисмоний ва юридик шахсларга банк ҳисобварақларини очишда ва уларга маблағларни кирим қилишда “Ўз мижозингни бил” (KYC, e-KYC) ва “Даромадни легаллаштиришга қарши курашиш” (AML) тизимларига мувофиқ банклар томонидан асословчи ҳужжатлар олиниши мумкинлиги бўйича нормалар белгиланмоқда.
Изоҳ (0)