Латвия Сейми (парламенти) Украинанинг тинч аҳолисини қўллаб-қувватлаш тўғрисидаги қонунга давлат автомашиналарини Украина ҳукумати мулкига бепул топшириш имкониятини кўзда тутувчи тузатишларни маъқуллади. Бу ҳақда Meduza хабар бермоқда.
“Биз маст ҳолда машина бошқарган ҳайдовчилардан мусодара қилинган автомабилларни сотиш, қайта ишлаш учун ёки эҳтиёт қисмлар учун демонтаж қилишга топширишимиз мумкин, аммо ҳозирги шароитда улар Украина халқи учун фойдали ёрдам бўлишини кўряпмиз”, — деди мудофаа бўйича Сейм комиссияси раиси Раймондс Бергманис.
Мусодара қилинган автомашиналарни Украина армияси эҳтиёжларига ўтказиш тўғрисидаги қарор ҳар бир ҳолатда Латвия ҳукумати томонидан қабул қилинади. Автомобиллар Украина ҳукумати билан ҳамкорлик қилувчи ва ёрдам ҳақида мурожаатларни қабул қилувчи ташкилот орқали топширилади.
Маст ҳолда рулга ўтирган ҳайдовчилардан тортиб олинган машиналарни Украинага ўтказиш таклифини Латвия молия вазири Арвилс Ашераденс билдирган. Уни Латвия Сеймидаги ҳукмрон коалиция қўллаб-қувватлаган.
Изоҳ (0)