Ўзбекистон халқ артисти Юлдуз Усмонова 16 февраль куни жонли ижродаги навбатдаги концерт дастурига старт берди. “Дарё” мухбирлари ўзбек санъати примадоннаси концерт дастуридан репортаж тайёрлади.
Юлдуз Усмонова ҳар йилги анъанасига кўра бу йил ҳам концерт дастурида тўлиқ жонли ижрода куйлади. Концерт дастури 16 февралдан 28 февралгача давом этади ва унда 17 та сеанс мавжуд.
Концерт дастурида бошловчи вазифасини қизиқчи, актёр Шукурулло Исроилов бажарди. У ўз рэпертуаридаги ҳазиллар билан концерт дастурига ташриф буюрган мухлисларга кулги улашди.
“Биринчи марта 2017 йилда Юлдуз Усмонованинг концерт дастурига бошловчилик қилганман. Шу йилдан буён уларнинг концерт дастурини олиб бораман. Элимиз суйган санъаткор, примадоннанинг концертида қатнашиб, сухандон бўлиб хизмат қилаётганимдан жуда хурсандман. Юлдуз Усмонова билан ишлашнинг қийинчилиги эмас, завқи бор”, — дейди қизиқчи.
Концерт давомида Юлдуз Усмонова мухлислари билан суҳбат қурди ва улардан кайфиятни юқори даражага чиқариб, қўшиқларини тинглашни сўради.
Юлдуз Усмонова янги концерт дастурида раққосалар борасида кастинг ўтказганини таъкидлаб, халқ танлаган раққоса саҳнага чиққанини айтди.
Шунингдек, Юлдуз Усмонова кўплаб шеърларини куйга солиб, ижро этган шоира Лола Собирова концертда учта блок бўлганини: улардан иккитасида хонанданинг янги, биттасида эса носталгия, яъни 80—90 йиллардаги хит тароналар борлигини айтиб ўтди.
“Бу йилги рэпертуарларнинг иккитасида янги қўшиқлар, учинчи блокда носталгия тароналар бор, у мусиқаларни тинглаб, 80—90 йилларга бир зум қайтамиз. Дастур шунақа тузилганки, янги қўшиқлардан баҳраманд бўлиб турган вақтингизда, сизни 80—90 йилларга олиб кириб кетади.
Бу йилги концерт дастури февраль ойида бўлиб ўтганининг сабаби март ойи Рамазон ойи кириб келади, 8 мартгача байрам дастурлари бўлади, шуни инобатга олган ҳолда 13 кун кечки, 4 кун кундузги сеанс қўйилган”, — дейди шоира Лола Собирова.
Хонанда ўтган йили Ботир Қодиров, Малик билан дуэт куйлаган эди. Янги концерт дастурида эса фақатгина Малик билан дуэт ижро этди.
Ўзбек примадоннасининг концерт дастурида нафақат Ўзбекистон, балки қўшни давлатлар, АҚШдан келган мухлислар ҳам иштирок этди.
Юлдуз Усмонова концертининг сўнгида мухлислари билан бирга хитга айланган “Хаста бўлма”, “Муҳаббат” ва бошқа тароналарини куйлади.
Қуйида видеони тўлиқ томоша қилишингиз мумкин.
Изоҳ (0)