80-yillar xitlaridan yangi qo‘shiqlargacha: Yulduz Usmonovaning yangi konsertidan reportaj (video)

O‘zbekiston xalq artisti Yulduz Usmonova 16-fevral kuni jonli ijrodagi navbatdagi konsert dasturiga start berdi. “Daryo” muxbirlari o‘zbek san’ati primadonnasi konsert dasturidan reportaj tayyorladi. 

Yulduz Usmonova har yilgi an’anasiga ko‘ra bu yil ham konsert dasturida to‘liq jonli ijroda kuyladi. Konsert dasturi 16-fevraldan 28-fevralgacha davom etadi va unda 17 ta seans mavjud.

Konsert dasturida boshlovchi vazifasini qiziqchi, aktyor Shukurullo Isroilov bajardi. U o‘z repertuaridagi hazillar bilan konsert dasturiga tashrif buyurgan muxlislarga kulgi ulashdi.

“Birinchi marta 2017-yilda Yulduz Usmonovaning konsert dasturiga boshlovchilik qilganman. Shu yildan buyon ularning konsert dasturini olib boraman. Elimiz suygan san’atkor, primadonnaning konsertida qatnashib, suxandon bo‘lib xizmat qilayotganimdan juda xursandman. Yulduz Usmonova bilan ishlashning qiyinchiligi emas, zavqi bor”, — deydi qiziqchi.

Konsert davomida Yulduz Usmonova muxlislari bilan suhbat qurdi va ulardan kayfiyatni yuqori darajaga chiqarib, qo‘shiqlarini tinglashni so‘radi. 

Yulduz Usmonova yangi konsert dasturida raqqosalar borasida kasting o‘tkazganini ta’kidlab, xalq tanlagan raqqosa sahnaga chiqqanini aytdi.

Shuningdek, Yulduz Usmonova ko‘plab she’rlarini kuyga solib, ijro etgan shoira Lola Sobirova konsertda uchta blok bo‘lganini: ulardan ikkitasida xonandaning yangi, bittasida esa nostalgiya, ya’ni 80—90-yillardagi xit taronalar borligini aytib o‘tdi.

“Bu yilgi repertuarlarning ikkitasida yangi qo‘shiqlar, uchinchi blokda nostalgiya taronalar bor, u musiqalarni tinglab, 80—90-yillarga bir zum qaytamiz. Dastur shunaqa tuzilganki, yangi qo‘shiqlardan bahramand bo‘lib turgan vaqtingizda, sizni 80—90-yillarga olib kirib ketadi.

Bu yilgi konsert dasturi fevral oyida bo‘lib o‘tganining sababi mart oyi Ramazon oyi kirib keladi, 8-martgacha bayram dasturlari bo‘ladi, shuni inobatga olgan holda 13 kun kechki, 4 kun kunduzgi seans qo‘yilgan”, — deydi shoira Lola Sobirova.

Xonanda o‘tgan yili Botir Qodirov, Malik bilan duet kuylagan edi. Yangi konsert dasturida esa faqatgina Malik bilan duet ijro etdi. 

O‘zbek primadonnasining konsert dasturida nafaqat O‘zbekiston, balki qo‘shni davlatlar, AQSHdan kelgan muxlislar ham ishtirok etdi.

Yulduz Usmonova konsertining so‘ngida muxlislari bilan birga xitga aylangan “Xasta bo‘lma”, “Muhabbat” va boshqa taronalarini kuyladi.

Quyida videoni to‘liq tomosha qilishingiz mumkin.