“Ейишга ноним қолмаганида кўрпа қавишни ўрганганман”. Вазира Юнусова онасидан айрилгани, турмуш ўртоғи қамалганидан кейин кўрган қийинчиликлари ҳақида (видео)

Ўзбек миллий академик театри актрисаси Вазира Юнусова “Севимли” телеканалининг “Машҳурлар” кўрсатувига берган интервьюсида онасидан айрилгани, турмуш ўртоғи қамалиб қолганидан кейин қийинчиликларга дуч келгани, саломатлигидаги муаммолар туфайли операцияни бошдан кечиргани ҳақида сўзлаб берди.

“Меҳнат билан ҳамма қийинчиликни енгса бўлади” 

1998 йили бошимга жуда катта ташвиш тушган, онам вафот этган, бундан ташқари, турмуш ўртўгим ҳам қамалиб қолган, “декрет”да бўлганман, ётоқхонада яшаганман. Ўша кезлари уйда ейишга нон бўлмаган, бунинг устига Яйпандан акамнинг қизини — жиянимни ҳам олиб келганман.

Бу жиянимни ўзимизнинг қариндошимизга турмушга берганмиз. Жиянимнинг уддабуронлигига ҳайрон қолганман. Кичкина, озғин қизча онамдан кўрпа қавишни ўрганган. Кейин менга келиб аммажон, буни шундай қависак, пул берар экан, деган. Болам учун буни ўрганишга киришиб кетганман.

Ҳаётда қийинчилик, меҳнат билан бола-чақа боқса бўлади. Меҳнат билан ҳамма қийинчиликни бошдан кечирса бўлади. Енгиллик билан топилган пул осонликча кетади. Кейин кўрпа қавиганмиз, бошида қийшиқ қилиб қавиганман, олиб чиққанимда роса хафа бўлишган, қайта олиб чиқиб, бошқатдан қилганман.

“Аллоҳдан уч нафар фарзандим учун операциядан соғ-саломат чиқаришини сўрадим”

Кўпчилик актрисалар ошқозонини операция қилдириб озиб кетяпти, сиз ҳам олиб ташладингизми, озиб кетибсиз, деган саволлар кўп бўлди. Йўқ, мен 25 октябрда, халқимиз хизматини қилаётган вақтимда ўт пуфагимдаги тош азоб бериб, 26 октябрь куни тўғри шифохонага борганман. Операция бўлдим, Аллоҳдан уч нафар фарзандим учун операциядан соғ-саломат чиқаришини сўрадим. Менга қараган барча шифокорларга миннатдорчилигимни билдираман. Менга жуда яхши қарашди, қўллари енгил, чаққон инсонлар экан. Ҳозир ўзимни жуда яхши ҳис қиляпман.