Туркиядаги умумий — ҳам президентлик, ҳам парламент сайловлари олти ойдан бир йилгача кечиктирилиши мумкин. Бу ҳақда Туркиянинг Haberturk нашрида чоп этилган мақолада айтилмоқда.
Мақола муаллифлари таъкидлаганидек, мамлакатдаги ҳукмрон партия кенг кўламли зилзила фонида бу масалага жиддий ёндашмоқда.
“Сайлов бўйича қарор қабул қилинади. Шундан сўнг Олий сайлов комиссияси зилзила оқибатлари туфайли тўртта вилоятда тўлиқ ва олтита вилоятда қисман сайлов ўтказиш амалда имконсиз бўлиб қолганини маълум қилади ва сайловни бошқа муддатга қолдиришни сўрайди”, — дейилган мақолада.
Нашрнинг хабар беришича, сайловни кейинга қолдириш кун тартибига қўйилган, чунки зилзила билан боғлиқ мавжуд вазият ҳозирданоқ сайлов жараёнини ҳукумат учун мутлақо салбий томонга ўзгартирган.
Мақола муаллифи Фотиҳа Олтайли таъкидлаганидек, сайловларни кейинга қолдириш учун ҳокимият Конституциявий суднинг худди шундай вазият бўйича эски қарорларидан бирини қўллайди.
Аввалроқ Туркия президенти Ражаб Тоййиб Эрдўғон мамлакатда умумий сайловлар 2023 йилнинг 14 майида ўтказилишини, бу аслида белгиланган муддатдан бир ой олдин эканини айтганди.
Эслатиб ўтамиз, 6 февраль куни Туркиянинг жануби-шарқий қисмида иккита кучли зилзила содир бўлди, Суриянинг бир қанча вилоятларига ҳам таъсир қилди. Қурбонлар сони аллақачон 34 минг кишидан ошди. Қутқарув ишлари давом этмоқда. БМТ маълумотларига кўра, қурбонлар сони 50 минг кишидан ортиб кетиши мумкин.
Изоҳ (0)