Украина жанговар ҳаракатларда “катта миқдордаги ўқ-дорилардан” фойдаланмоқда. Буюк Британия эса украиналик ҳарбийларни ўқитишда уларга НАТОга аъзо мамлакатлар армиясига хос тарзда снарядлардан тежамкорлик билан фойдаланишни ўргатишга уринмоқда. Бу ҳақда Британия мудофаа вазири Бен Уоллес Times Radio эфирида маълум қилди, видео радиостанциянинг YouTube каналига чиқарилди.
“Рус ёки советча жанг усули — бу жуда оғир ўқ-дорилар билан артиллериядан оммавий ўққа тутишни билдиради. Биз Ғарбда ва НАТОда ҳеч қачон бундай тарзда жанг қилмаймиз. Уларни Ғарб услубидаги жангга ўргатяпмиз”, — деди Уоллес.
Украина расмийлари ҳам ўқ-дорилар кўп ишлатилаётгани ҳақида гапириб, бу вазиятни жангларнинг шиддати билан изоҳлаганди — февраль ойи бошида Украина президенти офиси вакили снарядлар деярли қолмаганини айтган. Украина Қуролли кучлари кунига 5—6 минг ўқ-доридан фойдаланмоқда — бу кичикроқ Европа давлатининг тинчлик даврида бир йилда ишлаб чиқарадиган снарядлари миқдорига тенг, деб таъкидлайди Financial Times. Европа ишлаб чиқарувчилари ортиб бораётган талабни қондириш ва заводларни зудлик билан кенгайтириш заруриятидаги муаммоларга дуч келмоқда, деб ёзади газета.
АҚШ ҳам снарядларни Украинага етказиб бераётгани сабабли ўқ-дорилар танқислигини бошдан кечирмоқда, биринчи навбатда, гап 155 миллиметрли артиллерия қуроллари ва Stinger кўчма зенит тизимлари учун ўқ-дорилар ҳақида кетмоқда. Келгуси икки йил ичида Пентагон снарядлар ишлаб чиқаришни 500 фоизга ошириб, ўқ-дорилар ишлаб чиқаришни Корея уруши даражасига етказмоқчи, деб хабар берганди The New York Times.
Изоҳ (0)