Россиянинг Украинага уруши фонида қишки об-ҳаво Европага энергия қарамлигидан қочишга ёрдам берди. Бу ҳақда Politico хабар берди.
Еврокомиссиянинг янги ҳисоб-китобларига кўра, Европа газ омборлари ярмидан кўпи тўлдирилгани учун бу қишдан ўта олди. Бу Россия президенти Владимир Путиннинг Европани газ таъминотини тўхтатиш орқали музлатиб қўйишга уринишига қарамай, ЕИ иқтисоди совуқ ҳавода, жумладан, кейинги қишдан ҳам омон чиқишини билдиради.
Россиядан газ етказиб беришдаги узилишлар туфайли Европада электр энергияси тақчиллиги ҳақида хавотирлар пайдо бўлганди. Бироқ унчалик совуқ бўлмаган об-ҳаво, суюлтирилган газ импортининг ортиши ва газ истеъмолининг сезиларли даражада камайиши комбинацияси март ойи охиригача 50 миллиард куб метрдан ортиқ газ омборларда қолиши кутилмоқда.
Қишки иситиш мавсумини катта захира (Европа Иттифоқининг тахминан 100 миллиард куб метрлик жами захирасининг 50 фоиздан ортиғи) билан якунлаш қисқа муддатли газ танқислиги билан боғлиқ барча ташвишларни бартараф этади. Бу келаси қиш олдидан Европанинг энергия хавфсизлиги билан боғлиқ хавотирларга ҳам барҳам бериши мумкин.
Украинадаги уруш ва Европадаги газ билан боғлиқ вазият
Бир қатор Европа Иттифоқи давлатлари Россия газ таъминотига тўлиқ ёки қаттиқ қарам эди. Россиянинг Украинага бостириб кириши бошланганидан кейин аксарият давлатлар бу қарамликни камайтиришга киришди.
2022 йилнинг 25 августида Европада газ нархи рекорд даражага етди – МВт/соат учун 316 евро ёки минг куб метр учун 3,3 минг доллар. Сентябрь бошида “Шимолий оқим” орқали газ етказиб бериш бутунлай тўхтатилиши фонида кўк ёқилғи нархи кўтарилди.
2022 йил декабрь ойида Европа Иттифоқи мамлакатлари энергетика вазирлари газ учун энг юқори нархни белгилашга келишиб олди. У мегаватт-соат учун 180 еврони ташкил қилади ва 2023 йил февраль ойи ўрталарида кучга кириши кутилмоқда.
Кремл санкцияларни “бозор механизмига тажовуз қилишга уриниш” деб атади ва жавоб чораларини ваъда қилди. Бироқ Россия гази учун чеклов нархини белгилаш бўйича келишилганидан бир ҳафта ўтгач, улар “Ямал-Европа” газ қувури орқали ЕИга этказиб беришни қайта тиклаш ҳақида гапира бошладилар.
Россия агар “нархлар чегараси” жорий этилса, Европа Иттифоқига газ етказиб беришни тўхтатиш билан таҳдид қилган.
2023 йилнинг 4 январида Европада газ нархи Украинада уруш бошланганидан бери энг паст даражага тушди.
2023 йил 6 январь куни Германия вице-канцлери Роберт Хабек Путин Европани газ билан шантаж қилишда ютқазганини айтди. Берлин Россиядан узилган газ, нефть ва кўмирни бошқа каналлар орқали ўрнини боса олди.
Изоҳ (0)