Самарқанд вилояти Тойлоқ туманида шахсий ёзишмалар ва суратларни тарқатмаслик учун эркакдан пул талаб қилган йигит ушланди. Бу ҳақда вилоят Ички ишлар бошқармаси ахборот хизмати хабар берди.
Хабарга кўра, Сурхондарё вилоятининг Узун туманида туғилган, Тошкент вилояти Бўстонлиқ туманида яшовчи 22 ёшли фуқаро аёл киши номидан ижтимоий тармоқларда саҳифа очган. Шу орқали АҚШда ишловчи эркак билан танишиб, у билан ишқий муносабат қурган. Кейинчалик йигит ушбу эркакдан ёзишмалар ва суратларни тарқатмаслик учун пул талаб қила бошлаган. Дастлаб, 400, сўнг 200 доллар ундирган.
Шундан сўнг йигит ундан монтаж қилинган суратлар ва ёзишмаларни тарқатиб юбормаслик учун 28 минг доллар талаб қилган. Ҳолат юзасидан суриштирув натижасида унинг исми ва манзили аниқланган. У вилоят Ички ишлар бошқармаси, жиноят қидирув бошқармаси ходимлари томонидан Тошкент вилояти ҳудудида ушланган. Ҳозирда унга нисбатан Тойлоқ тумани ички ишлар бўлими ҳузуридаги тергов бўлими томонидан Жиноят кодексининг 165-моддаси 2-қисми билан жиноят иши қўзғатилиб, тергов ҳаракатлари олиб борилмоқда.
Изоҳ (0)