Туркияда 6 февраль куни содир бўлган зилзиладан кейин қидирув-қутқарув ишлари давом этмоқда. Бу сафар қутқарувчилар 140 соат давомида вайроналар остида қолиб кетган етти ойлик чақалоқни қутқарди. Бу ҳақда “Zakon.kz” хабар берди.
Маълум қилинишича, чақалоқнинг исми Ҳамза бўлиб, у қутқарилгунга қадар вайроналар остида қимир этмай ётган.
Қутқарувчилар аввал ҳам бир неча сутка давомида вайроналар остида бўлган одамларнинг ҳаётини сақлаб қолган. Шумладан, 96 соат давомида вайронлар остида қолган суриялик қиз қутқариб қолинганди.
Зилзила содир бўлган ҳудудда қутқарув ишларини олиб бораётган ўзбекистонлик қутқарувчилар зилзиладан 102 соат ўтиб вайроналар остида қолган 32 ёшли эркакни тирик олиб чиққанди. Туркияга Ўзбекистондан 100 кишидан иборат қидирув-қутқарув отряди жўнатилган.
Қидирув-қутқарув операцияси бошланганидан буён Ўзбекистон Фавқулодда вазиятлар вазирлиги ходимлари 13 нафар жабрланган ва 64 нафар ҳалок бўлганларни вайроналар остидан олиб чиқди.
Сўнгги маълумотларга кўра, Туркиядаги зилзила қурбонлари сони 24,6 минг кишидан ошди, ҳалок бўлганлар ва жароҳатланганлар сони ўсишда давом этмоқда.
Изоҳ (0)