Актриса Дурдона Қурбонованинг онаси Феруза Мансурова қизига қандай рол ўйнаши оила аъзолари томонидан тақиқлангани ва хонанда Имрон билан муносабатлари ҳақида гапириб берди.
“Дурдонанинг дунёқараши олдин бошқача эди, ҳозир бутунлай бошқача”
“Ҳинди шоу”да рол ўйнаганда Шаҳзод Султонов билан бирга бир қилиб, ўхшатиб чиқариб беришган. Клипдаги ролини кўриб хурсанд бўлганман, лекин у ерда ўзбекчилигимизга тўғри келмайдиган, ушлаб, кўтариб олган жойлари бор. Дадасида ҳам, тоғаларида ҳам шунақа жойларини олмаслиги керак эди, деган нарса бўлди. Рол ўйнасин, лекин бунақа таниладиган бўлса, танилмай қўя қолсин, дейишди.
Ўзбекчилигимизга тўғри келмайдиган ролларни ҳам бошқача, чиройли қилиб ўйнаб берса ҳам, у ерини, бу ерини ушлаб ўйнамасин деб фикр билдиришган. Ўшанда ўзим ҳам гапирганман. Унинг дунёқараши олдин бошқача эди, ҳозир бутунлай бошқача. Ўзи ҳам интервьюда: “Ҳозирги ақлим бўлганида ўша ролларни ўйнамаган бўлар эдим”, — деб айтган.
“Дурдона ҳам, Имрон ҳам ҳаётда ҳеч қачон бир-бирига тескари бўлмаган”
Имронни ҳурмат қиламан, феъл-атвори ҳам оғир, вазмин, шунингдек, тарбияси, муомаласи жуда яхши инсон. Дурдона Имрон билан яхши партнёр. Одамлар шунақа қабул қилишди: Имрон чиққанда Дурдонани, Дурдона чиққанда Имронни кўз олдиларига келтирадиган бўлиб қолишган.
Ҳаётда иккаласи ҳам бир-бирини ҳурмат қилади, бир-бирига нисбатан ҳеч қанақа ёмон сўз бўлмаган, шунчаки пиар қилишганда одамлар турли хил гап-сўзларни тарқатишади. Дурдона ҳам, Имрон ҳам ҳаётда ҳеч қачон бир-бирига тескари бўлмаган, муносабатларида ёмон нарсани сезмаганмиз.
Изоҳ (0)