Қозоғистоннинг Туркистон шаҳрида 10 февраль куни Марказий Осиё давлатларининг биринчи парламентлараро форуми бўлиб ўтди.
Унда Ўзбекистон Республикаси Олий Мажлиси Сенатининг раиси Танзила Норбоева бошчилигидаги парламент делегацияси ҳам иштирок этди. Forum иштирокчиларига Марказий Осиё давлатлари раҳбарлари қутлов сўзларини йўллади.
Шавкат Мирзиёевнинг Марказий Осиё давлатларининг биринчи парламентлараро форуми иштирокчиларига йўллаган қутлов сўзини Танзила Норбоева ўқиб эшиттирди. Форумда Марказий Осиё мамлакатлари ўртасида стратегик ҳамкорликни мустаҳкамлаш ва ушбу жараёнда парламентларнинг ролини янада оширишга доир масалаларга алоҳида эътибор қаратилди.
Таъкидланишича, президентнинг ташаббуси асосида минтақа давлатларининг етакчилари ўртасида олиб борилаётган ўзаро ишончга асосланган фаол сиёсий мулоқотлар изчиллик ва мунтазамлик касб этмоқда. Ўзбекистонда глобал хавфсизлик борасида яқин қўшнилар билан самарали парламентлараро алоқаларни янада мустаҳкамлаш бўйича белгиланган устувор йўналишлардан келиб чиқиб, мамлакатнинг парламент дипломатияси концепциясининг қабул қилингани ўзининг ижобий самарасини бермоқда.
“Халқаро сиёсатдаги юқори турбулентлик шароитида ва жаҳон иқтисодиётида инқирозли ҳодисаларнинг кучайиши фонида Марказий Осиё давлатлари парламентларининг саъй-ҳаракатларини бирлаштириш, юзага келаётган муаммоларни биргаликда ҳал этишга бўлган эҳтиёж тобора ортиб бормоқда.
Ушбу форумданинг йўлга қўйилиши эса ана шундай ҳаётий талабларни қондириш билан бир қаторда, минтақавий ҳамкорликка сезиларли даражада суръат бағишлайди ҳамда халқларимизнинг янада яқинлашишига туртки беради.
Парламент вакиллари аҳолининг талаб ва эҳтиёжларидан, одамларни қийнаб келаётган муаммолардан яхши хабардорлиги ҳамда уларни ҳал этишда парламент ресурсларини етарлича жалб қила олиш имконига эгалиги Марказий Осиёда яшовчи халқлар манфаатларига тўла жавоб берадиган ечимларни ишлаб чиқишга замин яратади.
Минтақа давлатлари парламентларининг самарали мулоқоти бўйича йўлга қўйилаётган мазкур янги платформа доирасида мамлакатлар қонун чиқарувчи органлари ўзаро ҳамкорлигининг ҳуқуқий асосларини мустаҳкамлаш борасидаги ишларни янада фаоллаштиришимиз керак.
Шунингдек, миллий қонунчилик асосларини ўзаро уйғунлаштириш ва яқинлаштириш бўйича қонунчилик нормаларини чуқур таҳлил қилиш ҳамда такомиллаштириш мақсадга мувофиқ”, — дея таъкидлади Норбоева.
Форумда умумий тарихий-маданий меросга асосланган маданий-гуманитар ҳамкорликни кенгайтиришда парламент аъзоларининг иштирокини янада кучайтириш масалалари ҳам муҳокама марказида бўлди.
Форум иштирокчилари мамлакатларимиз ўртасидаги икки ва кўп томонлама муносабатларни ривожлантиришда турли форумлар, фестиваллар, маданий тадбирларни ўтказиш, халқларимизни бир-бири билан янада жипслаштиришга хизмат қилувчи туризм йўналишлари бўйича ҳамкорликдаги лойиҳаларни амалга ошириш юзасидан ўзаро фикр алмашди.
Тадбир якунида Марказий Осиё давлатларининг биринчи парламентлараро форумининг минтақа мамлакатлари ўртасидаги ҳар томонлама стратегик шерикликни қўллаб-қувватлаш мақсадида парламентлараро алоқаларни янада мустаҳкамлашга қаратилган Туркистон декларацияси қабул қилинди.
Изоҳ (0)