Yapon razvedkasi Ukrainadagi urushda 20 dan ortiq rossiyalik general halok bo‘lganini xabar qildi
Rossiyaning Ukrainaga keng koʻlamli bosqini boshlanganidan beri 20 dan ortiq rus generali halok boʻldi, deb yozmoqda Nikkei Yaponiya razvedkasining AQSH va Yevropa davlatlari bilan hamkorlikda olingan maʼlumotlariga tayanib.
Nikkei keltirgan versiyalardan biriga ko‘ra, Ukraina armiyasi mobil telefon signallari orqali rus generallarini topishga muvaffaq bo‘lgan. Boshqa versiyaga ko‘ra, bunda Donbassning bosib olingan hududlaridagi Ukraina tomon ma’lumotchilar yordam bergan, dedi ismini oshkor etmagan yuqori martabali yapon razvedkachisi.
2022-yil avgustida Britaniya harbiy razvedkasi Ukrainadagi urushda kamida 10 nafar rossiyalik general halok bo‘lganini ma’lum qilgandi.
The New York Times gazetasining yozishicha, Qo‘shma Shtatlar va boshqa G‘arb davlatlari Rossiya bosqinida 200 mingga yaqin rus askari halok bo‘lgan yoki yaralangan, deb baholamoqda.
Rossiya Mudofaa vazirligi oxirgi marta 2022-yil sentabr oyida o‘z yo‘qotishlari haqida xabar bergandi. Ushbu ma’lumotlarda 5 937 rus askari halok bo‘lgani aytiladi. 9-fevral kuni Ukraina Qurolli kuchlari Bosh shtabi urush boshlanganidan beri 135 ming rossiyalik halok bo‘lganini ma’lum qildi.
“Mediazona” va BBC rus xizmati maʼlumotlariga koʻra, 2023-yil fevral oyi boshiga kelib, ochiq manbalardan maʼlum boʻlishicha, urushda 13 mingdan ortiq rus askari, jumladan, toʻrt nafar general halok boʻlgan.
