Сирдарё вилоятида яшовчи онахон Зулайҳо Исмоилова нафақа пулини Туркиядаги зилзиладан жарбланганларга ёрдам тариқасида юборди. Бу ҳақда Зулайҳо ая Исмоилованинг ўзи видеомурожаатида маълум қилди.
Сирдарё вилоятининг Ховос туманида яшовчи Зулайҳо ая Исмоилова айни кунда 99 ёшда.
Тўққиз нафар фарзанднинг онаси, невара, чевара ҳамда эвараларининг севимли бувиси биринчи даражали меҳнат фахрийси бўлгани учун давлатдан 4,5 миллион сўм миқдорида нафақа олади.
“Туркия халқи бошига оғир иш тушибди. Уларга жудаям ичим ачиди. Шунга нафақамдан орттирган пулларимни Туркиядаги зилзиладан жабрланганларга юборяпман. Сал бўлса-да, ёрдамим тегса хурсанд бўлардим. Аллоҳ уларнинг мушкулини осон қилсин”, — дейди онахон Туркия халқи ҳақида гапирар экан.
Зулайҳо ая Исмоилованинг набираси, журналист Асқар Исмоиловнинг “Дарё”га қўшимча қилишича, онахон ва унинг яқинлари Туркия халқига ёрдам тариқасида 20 миллион сўм миқдоридаги маблағни хайрия жамғармасига топширган.
Изоҳ (0)