Нукус воқеаларида ҳуқуқни муҳофаза қилувчи орган ходимларининг ноқонуний хатти-ҳаракатлари юзасидан қўзғатилган жиноят ишлари тергови доирасида уч нафар шахсга нисбатан Жиноят кодексининг тегишли моддалари билан айблов эълон қилинди, деб хабар бермоқда Бош прокуратура матбуот хизмати.
Маълум қилинишича, уларга нисбатан қамоққа олиш тарзидаги эҳтиёт чораси қўлланилди. Ҳозирда жиноят ишлари бўйича тергов ҳаракатлари давом этмоқда. Тергов натижаси бўйича жиноят ишларининг судга юборилиши таъминланади.
Шавкат Мирзиёев 2022 йилнинг июлида ўтказилган йиғилишда Нукусда бўлиб ўтган воқеалар ҳақида гапириб, “Куч тузилмаларининг ҳаракатлари ҳам чуқур таҳлил қилинсин. Агар улар томонидан нотўғри куч ишлатилган бўлса, амалдаги қонунчиликка асосан уларнинг ҳам жиноий жавобгарлиги таъминлансин”, деб айтганди.
31 январь куни Бухоро вилояти судида 1−2 июль кунлари Нукус воқеаларида айбланаётган 22 нафар судланувчига нисбатан жиноят ишини кўриб чиқиш якунлари бўйича суд ҳукми эълон қилинди. Ҳукм қилинганлардан бири — Полат Шамшетов 4 февраль куни тергов ҳибсхонасида вафот этди. Мустақил комиссия унинг ўлими юзасидан текширув ўтказиб, марҳумга нисбатан руҳий ёки жисмоний қийноқ қўлланилиши мумкинлигига оид маълумотлар ассосиз эканини аниқлади.
Бош прокуратура ахборотига кўра, 2023 йил 17 январь куни 18 ва 21 нафар шахсга (барчасига қамоқ эҳтиёт чораси қўлланилган) нисбатан Жиноят кодексининг 244-моддаси ва бошқа тегишли моддалар билан бўлган иккита жиноят иши айблов хулосаси билан мазмунан кўриш учун Қорақалпоғистон судига юборилган.
6 февраль куни 39 нафар судланувчига оид жиноят ишини кўриб чиқиш бўйича очиқ суд жараёни бошланди.
Изоҳ (0)