Тошкент шаҳар Шайхонтоҳур туманида ички ишлар органлари ходимларига қаршилик кўрсатган 19 ёшли йигит олиб кетилди. Бу ҳақда шаҳар Ички ишлар бош бошқармаси ахборот хизмати хабар берди.
Ижтимоий тармоқларда ИИО ходимлари томонидан фуқаро олиб кетилаётганлиги акс этган видео тарқалиб, турли муҳокамаларга сабаб бўлмоқда. Бошқарма ахборот хизматининг маълум қилишича, 5 февраль куни 2004 йилда туғилган Ж.М. Шайхонтоҳур туманидаги “Малика” савдо мажмуаси олдида ИИО ходимларининг қонуний талабларини бажармасдан, уларга қаршилик кўрсатган.
Қайд этилишича, мазкур ҳолат юзасидан Ж.М.га нисбатан Маъмурий жавобгарлик тўғрисидаги кодекснинг 194-моддаси (ички ишлар органлари ходимининг қонуний талабларини бажармаслик) аломатлари билан маъмурий баённома расмийлаштирган. Жиноят ишлари бўйича Шайхонтоҳур тумани суди томонидан Ж.М.га нисбатан 15 сутка маъмурий қамоқ жазоси тайинланган.
Изоҳ (0)