Нукус воқеалари бўйича судланган Полат Шамшетов 4 февраль куни тергов ҳибсхонасида вафот этганди. Нукус воқеаларини ўрганиш ҳамда улар юзасидан мустақил текширув ўтказиш бўйича комиссия унинг ўлими юзасидан текширув натижаларини эълон қилди.
Унда қайд этилишича, 7 февраль куни комиссия аъзолари Полат Шамшетовнинг ўлими сабабларини аниқлаш мақсадида 4-сонли Тергов ҳибсхонасига бориб, у ердаги шароитлар, камера ёзувлари, дастлабки тиббий хулоса ва бошқа тегишли ҳужжатларни ўрганди. Шунингдек, марҳум билан битта камерада бўлган шахслар ва тергов ҳибсхонаси ходимлари билан суҳбат ўтказди.
Марҳум Полат Шамшетов билан бир камерада бўлган Б.М. ва Ш.С. билан суҳбатда, улар 3 февраль куни нонуштадан кейин камерада суд ҳукмини қайта-қайта ўқиган, муҳокама қилишган, тушликдан сўнг сайр қилишгач, камерага қайтишган. Уларнинг айтишича, шу кунларда П.Шамшетов кўп тамаки чеккани туфайли нафас олиши оғирроқ бўлиб қолган. Хонадошларнинг сўзларига кўра, ўша куни марҳум кўп безовталанган, тўсатдан уларнинг кўз ўнгида ҳушини йўқотган.
Камера ёзувларида марҳум Шамшетовнинг ўша кундаги ҳаракатлари, санитария-гигиена ходими ва тез тиббий ёрдамнинг оператив ҳаракатлари аниқ акс этган.
4 февраль куни соат 01:50 да Полат Шамшетовнинг соғлиги ёмонлашгани сабабли камерадошлари ҳибсхона тиббиёт бўлими шифокорини чақиртирган. Ҳибсхона тиббиёт бўлими фелдшери катта сержант Д.Темиров камерага келган вақтида маҳкум Шамшетов ҳушсиз ҳолатда бўлган. Соат 02:15 да РШTTЁИМ Бухоро вилояти филиали тез ёрдам шифокори А.Ғафуров ва фелдшер М.Рахмонов етиб келган вақтда маҳкум Полат Шамшетовнинг биологик ўлим ҳолатида экани аниқланган.
Ўрганиш давомида Бухоро вилоят суд тиббий экпертизаси томонидан ўтказилган текширувларнинг видеоёзувлари ҳам таҳлил қилинган.
Шунингдек, комиссия аъзолари марҳум вафот этган кунда ўлим сабабларини аниқлаш мақсадида Республика шошилинч тез тиббий ёрдам илмий марказининг Бухоро вилоятидаги филиалидан жалб қилинган тез ёрдам шифокори А.Ғафуров ва фелдшер М.Раҳмонов ҳамда суд-тиббий экспертизасини ўтказган Республика Суд тиббий экспертиза маркази Бухоро вилоят филиали мутахассислари билан ҳам суҳбатлашиб, керакли маълумотларни олган.
Бундан ташқари, маҳбусларга тасдиқланган меню асосида берилган таомлар кўриб чиқилиб, ошхонадаги шароитлар ўрганилган. Ўрганиш давомида марҳумга нисбатан руҳий ёки жисмоний қийноқ қўлланилиши мумкинлигига оид маълумотлар ассосиз экани аниқланган.
Эслатиб ўтамиз, Қорақалпоғистонда юз берган ҳолат ва воқеаларни ўрганиш ҳамда улар юзасидан мустақил текширув ўтказиш бўйича комиссия 2022 йилнинг июлида тузилган. Комиссия таркибига Олий Мажлиси вакиллар ва халқ депутатлари, нодавлат нотижорат ва жамоат ташкилотлари раҳбарлари ҳамда ходимлари киритилган.
Изоҳ (0)