Ўзбекистоннинг бюджет даромадлари 2023 йил январь ойида 14,9 триллион сўмни ташкил қилди. Бу ҳақда Иқтисодиёт ва молия вазирлиги ахборот хизмати хабар берди.
Хабарга кўра, январь ойининг биринчи ярмида давлат бюджети даромад ва харажатлари ўртасидаги салбий фарқ ойнинг биринчи ҳафтаси давомида иш ҳақи, пенсия ва ижтимоий нафақаларни тўлиқ молиялаштириш ҳамда йил бошида одатда бюджет тушумларининг кам бўлиши билан изоҳланади. Январь ойида мамлакатда ҳаво ҳароратининг кескин совиб кетиши ҳамда энергия ресурсларига талабнинг кескин ошиши туфайли хўжалик юритувчи субъектларга табиий газ ва электр энергияси етказиб беришдаги узилишлар ишлаб чиқариш ва хизмат кўрсатиш ҳажмларига салбий таъсир қилди.
Қайд этилишича, бу қарийб 30 минг тадбиркорлик субъектларининг солиқ қарздорлигини 1,2 триллион сўмга ўсишига олиб келди ва бюджет тушумларининг тўлиқ тушишига салбий таъсир қилди. Ушбу шароитда тадбиркорлик субъектларини қўллаб-қувватлаш мақсадида президентнинг 2023 йил 3 февралдаги қарори билан уларнинг солиқ қарздорликлари бўйича пеня ҳисоблашни тўхтатиш, солиқ қарздорликларини бўлиб тўлаш, моддий жавобгарликларга тортмаслик, кредит тўлов муддатларини узайтириш ҳамда айланма маблағларни тўлдиришга кредит олиш шартларини енгиллаштириш каби чоралар белгиланди. Бу эса тадбиркорлик субъектлари фаоллигини қайта тиклашга ва келгуси ойларда бюджет тушумларини кўпайишига туртки бўлади.
Маълум қилинишича, бюджет даромадлари 2022 йилнинг январь ойида 13,4 триллион сўмни ташкил қилган бўлса, 2023 йил январида 14,9 триллион сўмни ташкил қилди. Солиқ қарздорлиги ошмаган тақдирда даромадлар ўсиш суръатининг юқорироқ бўлиши кутилган.
Изоҳ (0)