ИШИД учта давлатнинг Афғонистондаги элчихонасига ҳужум қилиш билан таҳдид қилди

ИШИД жангарилари Хитой, Ҳиндистон ва Эроннинг Афғонистондаги элчихоналарини нишонга олиш билан таҳдид қилди. Бу ҳақда БМТнинг тегишли ҳисоботига таяниб, Ал Arabia хабар берди.

БМТнинг ИШИД террорчилик гуруҳлари фаолияти ҳақидаги ҳисоботига кўра, ИШИДнинг маҳаллий бўлими “Толибон” ва Афғонистон била алоқа ўрнатишга интилаётган давлатлар ўртасидаги муносабатларни бузишга уринмоқда. Мазкур ҳисобот Нью-Йоркда БМТ Хавфсизлик кенгашида муҳокама қилиниши кутилмоқда. Жангарилар “Толибон”нинг хавфсизликка бўлган энг жиддий таҳдидларидан бири бўлиб, Афғонистондаги аҳоли зич жойлашган ҳудудларда ҳужумлар уюштириб туради.

Бу Россия ва Покистон элчихоналарига, шунингдек, Кобулдаги Хитой фуқаролари тез-тез борадиган меҳмонхонага қилинган ҳужумлар фонида юз берган. Ҳиндистоннинг Кобулдаги элчихонаси тўлиқ ишламаса-да, 2022 йили Нью-Деҳлининг афғон халқига гуманитар ёрдамини мувофиқлаштириш учун қайта очилган.

ИШИД таҳдиди халқаро алоқаларни тиклаш ва қонунийликни қўлга киритиш борасидаги саъй-ҳаракатларида жиддий зарба бўлди. “Толибон” ҳокимиятни эгаллаб олганидан сўнг деярли барча Ғарб элчихоналари, жумладан, АҚШники ҳам Қатарга кўчирилди.

БМТ ҳисоботига кўра, Афғонистон шарқидаги Кунар, Нангаҳор ва Нуристон вилоятларида қўшни Покистон билан чегарадош бўлган ҳудудда ИШИДнинг 6 000 нафар жангчиси бор.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.

Мавзуга доир:

• Афғонистондаги терактларни молиялаштирган ИШИД етакчиси йўқ қилинди
• Суриядаги зилзиладан кейин ИШИД жангарилари қамоқдан қочиб кетди
• Афғонистон ТИВ биноси олдидаги теракт учун жавобгарликни ИШИД ўз зиммасига олди