Тбилиси шаҳар суди Грузиянинг учинчи президенти Михаил Саакашвилини озод этишни талаб қилган ҳимоячининг илтимосномасини қаноатлантирмади, деб хабар бермоқда Грузия Биринчи канали.
Тбилиси суди адвокатларнинг аризасини 2022 йил декабрдан бери кўриб чиқмоқда. Ҳимоя томони Саакашвилига нисбатан илгари чиқарилган ҳукмларнинг ижросини кечиктиришни ёки уни жазодан озод қилишни сўраган.
Михаил Саакашвили 2021 йилнинг кузида чегарани ноқонуний кесиб ўтиб, Грузияга қайтганидан бери ҳибсда сақланмоқда. Қамоқхонада унинг соғлиғи ёмонлашди. 2022 йилнинг май ойидан бери Саакашвили Тбилисидаги Vivamed клиникасида. Суд мажлислари давомида 20 нафар шифокор Саакашвилининг аҳволи оғир эканини айтди.
Февраль ойи бошида Украина Ташқи ишлар вазирлиги Грузия расмийларидан Саакашвилини “таҳқирлашни бас қилишни” ва уни Киевга қайтаришни талаб қилди, чунки Саакашвили Украина фуқаролигига эга.
Изоҳ (0)