Аввал эълон қилинганидек, “Ўзбекнефтгаз” АЖ томонидан республика аҳолиси эҳтиёжларини сифатли автобензин билан таъминлаш мақсадида, акциядорлик жамияти тасарруфдаги Бухоро нефтни қайта ишлаш заводида ишлаб чиқарилаётган маҳаллий маҳсулот билан бир қаторда, тайёр маҳсулотлар ҳам импорт қилинмоқда.
Жорий йилнинг январь ойида “Татнефть” (Россия) компанияси томонидан ишлаб чиқарилган AI-80-К-5 автобензинни импорт қилиш бўйича келишувга эришилиб, “ТАНЕКО” заводидан жами 50 минг тонна AI-80-К-5 русумдаги автобензини юклаб берилган.
AI-80 автобензинга бўлаётган талабнинг ортиб бораётганлигини ҳисобга олиб, тақчиллик, узилишлар ва АЁҚШлардаги навбатларнинг олдини олиш мақсадида, 4 февраль кунидан бошлаб Жамият тасарруфидаги АЁҚШлар орқали импорт қилинган AI-80-К-5 русумли автобензин сотувга чиқарилди.
Товар-хом ашё биржасида Ai-80-К-5 русумли автобензиннинг бошланғич нархи бир тоннаси учун 7 168,3 минг сўм, “Ўзбекнефтгаз” АЖга қарашли АЁҚШларда истеъмолчиларга сотиладиган якуний нархи бир литри учун 6 000 сўмни ташкил этмоқда.
Февраль ойида “Татнефть” компаниясидан қўшимча 50 минг тонна Ai-80-К-5 автобензини харид қилиниши режалаштирилмоқда.
Маълумот учун: Жамият томонидан жорий йилнинг январь ойида “Газпром” компанияси томонидан ишлаб чиқарилган 5 минг тонна Ai-80-К-5 русумли автобензин харид қилиниб, АЁҚШлар орқали республикамиз истеъмолчилари учун реализация қилинди.
“Ўзбекнефтгаз” АЖ матбуот хизмати
Изоҳ (0)