Америка Марказий разведка бошқармаси директори Уилям Бернс январь ойи ўрталарида Украина ҳудудининг 20 фоизини Россияга топшириш эвазига урушни тугатишни таклиф қилиш учун Киевга келган. Бу ҳақда Швейцариянинг Неуэ Зüрчер Zeitунг нашри Германия ҳукуматидаги икки мустақил манбага таяниб хабар бермоқда.
Қайд этилишича, АҚШ президенти Жо Байден номидан Бернс Киевга “ер эвазига тинчлик”, Москвага эса “тинчлик эвазига ер” таклиф қилган. Гап гўёки Украина ҳудудининг 20 фоизи ҳақида кетган, бу тахминан Донецк ва Луганск вилоятларига тўғри келади.
Хабарга кўра, Киев Украина ҳудудини бўлишдан бош тортган, Москва эса узоқ муддатда урушда ғалаба қозонишга умид қилмоқда. Нашрнинг қайд этишича, бундай таклифнинг рад этилиши Украинани Ғарб танклари билан таъминлаш тўғрисидаги қарорларга сабаб бўлган бўлиши мумкин.
Журналистларнинг ёзишича, МРБ директорининг айнан шу сафаридан сўнг АҚШ президенти Германия канцлери Олаф Шолснинг талабига бўйсуниб, Украинани Abrams жанговар танклари билан таъминлашга қарор қилди. Бу эса Берлиннинг Леопард 2 танкларини бошқа давлатлардан ҳам, ўзидан ҳам Киевга ўтказиш бўйича позициясини блокдан чиқарди.
Оқ уй ОАВнинг хабарини ёлғон деб атади.
Январь ойи ўрталарида Уилям Бернс Киевга яширинча ташриф буюргани ва Украина президенти Владимир Зеленский билан учрашгани ҳақида хабар берилганди. Учрашувда Бернс “Россиянинг яқин ҳафталар ва ойлардаги ҳарбий режалари бўйича” ўз тахминларини Зеленский билан бўлишгани айтилган.
Изоҳ (0)