Туркия Финляндия ва Швециянинг НАТОга кириш ҳақидаги аризаларни алоҳида-алоҳида кўриб чиқиши мумкин

Туркия ташқи ишлар вазири Мевлут Чавушўғлининг айтишича, Анқара Финляндия ва Швециянинг НАТОга аъзо бўлиш ҳақидаги аризаларини алоҳида-алоҳида кўриб чиқиши мумкин. Бу ҳақда вазир 30 январь куни Анқарада ўтказилган матбуот анжуманида маълум қилди.

“НАТОнинг кенгайишига қарши эмасмиз. Ва биз томондан Финляндия ёки Швецияга қарши ҳеч қандай фундаментал эътирозлар йўқ, аммо улар ҳам бизнинг хавотирларимизни ҳисобга олиши керак. Ҳозир уларнинг аризаларини алоҳида-алоҳида кўриб чиқиш варианти ҳақида ўйлаяпмиз. Президентимиз Туркия Швецияга нисбатан бошқачароқ позицияда бўлиши мумкинлигини айтди”, — дея вазирнинг сўзларидан иқтибос келтирган Ҳабертüрк телеканали.

Чавушўғлининг сўзларига қараганда, аризаларни алоҳида ажратиш бўйича ҳали расмий қарор йўқ. “Агар тегишли қарор қабул қилинса, биз уларни алоҳида кўриб чиқишни ўйлаяпмиз. Менимча, мамлакатларни муаммоли ва камроқ муаммолига ажратиш адолатдан бўларди. Лекин мақсадимиз бу давлатларни бир четга суриб қўйиш эмас. Позициямизни бизнинг сўровларимиз ва ташвишларимиз қай даражада қондирилаётганига холис баҳо бериш орқали танлаймиз”, — деди вазир.

Аввалроқ Туркия президенти Тоййиб Эрдўғон Финляндия ва Швециянинг НАТОга аъзо бўлиш истагига Туркия турлича жавоб бериши мумкинлигини тан олганди. Унинг таъкидлашича, агар керак бўлса, Анқара Финляндияга бошқача хабар юбориши мумкин, бу ҳолда “Швеция шокка тушади”. Аммо бунинг учун Хелсинки Стокгольмнинг “хатоларини такрорламаслиги керак”.

Эслатиб ўтамиз, 21 январь куни даниялик ўта ўнгчи сиёсатчи Расмус Палудан (у Швеция фуқаролигига ҳам эга) Туркиянинг Стокгольмдаги элчихонаси олдида Қуръонни ёқиб юборди. Орадан бир ҳафта ўтиб, Копенгагендаги Туркия элчихонаси олдида ҳам Қуръон ёқилди. Aftonbladet нашрига берган интервьюсида фаол Швеция НАТОга қабул қилинмагунча ҳар жума куни Туркия элчихонаси олдида Қуръонни ёқишга ваъда берган.

Туркия ҳукумати Қуръоннинг ёқилишни нафрат асосида қилинган жиноят, деб билмоқда. Швеция расмийлари бундай ҳаракатларга тўсқинлик қилмаётгани сабабли Туркия президенти Ражаб Тоййиб Эрдўғон Швециянинг НАТОга кириш ҳақидаги аризасини қўллаб-қувватлашдан бош тортди.

Айни пайтда Швециянинг аризасини тасдиқлаш билан боғлиқ жараён тўхтатилган. Икки давлатнинг НАТОга аъзо бўлиши учун тегишли қонун лойиҳаси Туркия парламенти томонидан маъқулланиши зарур.