Жонсон уруш бошланишидан олдин Путин унга ракета зарбалари билан таҳдид қилгани ҳақида айтиб берди

Буюк Британия собиқ бош вазири Борис Жонсоннинг айтишича, Украинага бостириб киришдан олдин Владимир Путин у билан қўнғироқлашган ва суҳбат давомида ракета зарбаси билан таҳдид қилган. Жонсон бу ҳақда 30 январь куни BBC телеканалида чиққан “Путин Ғарбга қарши” ҳужжатли фильмида гапирди.

Жонсоннинг сўзларига кўра, 2022 йил февраль ойида бўлиб ўтган суҳбат жуда узоқ ва ноодатий кечганди.

“Бир пайт у менга қандайдир тарзда таҳдид қилиб шундай деди: Борис, сизни хафа қилишни хоҳламайман, лекин ракета билан бунга бир дақиқа етарли бўлади”, — деди Жонсон Россия президентнинг сўзларини келтириб.

Собиқ бош вазирнинг сўзларига кўра, Путин бу гапни Украинадаги уруш ҳалокатли бўлиши, Ғарб санкцияларига ва Россия чегаралари яқинида НАТО кучларининг кўпайишига олиб келиши ҳақида Жонсоннинг огоҳлантиришидан кейин айтган.

“Путиннинг хотиржам оҳангда гапиришидан, у шунчаки мен уни музокараларга кўндиришга уринишимга шундай муносабат билдирди, деб ўйлайман”, — дея қўшимча қилди Жонсон.