Turkiya tashqi ishlar vaziri Mevlut Chavusho‘g‘lining aytishicha, Anqara Finlyandiya va Shvetsiyaning NATOga a’zo bo‘lish haqidagi arizalarini alohida-alohida ko‘rib chiqishi mumkin. Bu haqda vazir 30-yanvar kuni Anqarada o‘tkazilgan matbuot anjumanida ma’lum qildi.
“NATOning kengayishiga qarshi emasmiz. Va biz tomondan Finlyandiya yoki Shvetsiyaga qarshi hech qanday fundamental e’tirozlar yo‘q, ammo ular ham bizning xavotirlarimizni hisobga olishi kerak. Hozir ularning arizalarini alohida-alohida ko‘rib chiqish varianti haqida o‘ylayapmiz. Prezidentimiz Turkiya Shvetsiyaga nisbatan boshqacharoq pozitsiyada boʻlishi mumkinligini aytdi”, — deya vazirning soʻzlaridan iqtibos keltirgan Habertürk telekanali.
Chavusho‘g‘lining so‘zlariga qaraganda, arizalarni alohida ajratish bo‘yicha hali rasmiy qaror yo‘q. “Agar tegishli qaror qabul qilinsa, biz ularni alohida ko‘rib chiqishni o‘ylayapmiz. Menimcha, mamlakatlarni muammoli va kamroq muammoliga ajratish adolatdan bo‘lardi. Lekin maqsadimiz bu davlatlarni bir chetga surib qo‘yish emas. Pozitsiyamizni bizning so‘rovlarimiz va tashvishlarimiz qay darajada qondirilayotganiga xolis baho berish orqali tanlaymiz”, — dedi vazir.
Avvalroq Turkiya prezidenti Toyyib Erdo‘g‘on Finlyandiya va Shvetsiyaning NATOga a’zo bo‘lish istagiga Turkiya turlicha javob berishi mumkinligini tan olgandi. Uning ta’kidlashicha, agar kerak bo‘lsa, Anqara Finlyandiyaga boshqacha xabar yuborishi mumkin, bu holda “Shvetsiya shokka tushadi”. Ammo buning uchun Xelsinki Stokgolmning “xatolarini takrorlamasligi kerak”.
Eslatib o‘tamiz, 21-yanvar kuni daniyalik o‘ta o‘ngchi siyosatchi Rasmus Paludan (u Shvetsiya fuqaroligiga ham ega) Turkiyaning Stokgolmdagi elchixonasi oldida Qur’onni yoqib yubordi. Oradan bir hafta o‘tib, Kopengagendagi Turkiya elchixonasi oldida ham Qur’on yoqildi. Aftonbladet nashriga bergan intervyusida faol Shvetsiya NATOga qabul qilinmaguncha har juma kuni Turkiya elchixonasi oldida Qur’onni yoqishga va’da bergan.
Turkiya hukumati Qur’onning yoqilishni nafrat asosida qilingan jinoyat, deb bilmoqda. Shvetsiya rasmiylari bunday harakatlarga to‘sqinlik qilmayotgani sababli Turkiya prezidenti Rajab Toyyib Erdo‘g‘on Shvetsiyaning NATOga kirish haqidagi arizasini qo‘llab-quvvatlashdan bosh tortdi.
Ayni paytda Shvetsiyaning arizasini tasdiqlash bilan bog‘liq jarayon to‘xtatilgan. Ikki davlatning NATOga a’zo bo‘lishi uchun tegishli qonun loyihasi Turkiya parlamenti tomonidan ma’qullanishi zarur.
Izoh (0)