Туркия ўз фуқароларига АҚШ ва Европага бормасликни тавсия қилмоқда

Туркия ҳукумати ўз фуқароларини Европа ва АҚШга сафар қилишнинг эҳтимолий хавфидан огоҳлантирди, деб хабар бермоқда Deutsche Welle. Туркия Ташқи ишлар вазирлиги Европадаги фуқароларини намойишлар ўтаётган ҳудудлардан нари юришга чақирди. Мамлакат сўнгги пайтларда мусулмонлар ва туркларга қарши авж олган норозилик қитъада “диний муросасизлик ва нафратнинг хавфли даражасини” кўрсатаётганини таъкидлади.

Бундан ташқари, Туркия АҚШда “хорижийликларга нисбатан оғзаки ва жисмоний ҳужумлар ҳамда ирқчилик ҳаракатлари кузатилаётгани” сабаб, Қўшма Штатларга саёҳат қилмаслик ҳақида алоҳида огоҳлантириш берди.

Туркиянинг огоҳлантиришлари Дания, Финляндия, Норвегия ва Швециянинг шундай огоҳлантиришларидан кейин пайдо бўлди. Европанинг ушбу тўрт давлати Туркияга саёҳат қилиш бўйича маслаҳатларини янгилаган ва ўз фуқароларини бу мамлакатдаги норозилик намойишларидан қочишга чақирганди.

Маълумот учун 21 январь куни даниялик ўта ўнгчи сиёсатчи Расмус Палудан (у Швеция фуқаролигига ҳам эга) Туркиянинг Стокгольмдаги элчихонаси олдида Қуръонни ёқиб юборди. Орадан бир ҳафта ўтиб, Копенгагендаги Туркия элчихонаси олдида ҳам Қуръон ёқилди. Бу ҳаракатлар ортидан турклар Швециянинг Анқарадаги элчихонаси ва Истанбулдаги бош консуллик биноси олдида норозилик намойишлари ўтказди.