НАТО Украинадаги урушни тезда тугатиши мумкин, аммо бундай қилолмаслиги сабаби тушунтирилди
НАТО Украинадаги урушни жуда тез тугатиши мумкин, аммо бу ҳолда ядро уруши хавфи кескин ортади. Украина ташқи разведкасининг собиқ раҳбари, армия генерали Николай Маломужга таяниб, UNIAN хабар берди.
Генералнинг сўзларига кўра, Украинада Россия ва НАТО ўртасидаги эҳтимолий тўғридан-тўғри тўқнашув сценарийси ишлаб чиқилмаяпти.
“Агар жуда самарали операция тайёрланганда, уруш тезда тугаши мумкин эди, чунки Россия НАТО бирлашган кучлари салоҳиятининг ўндан бир қисмига ҳам эга эмас. Лекин бу, албатта, ядровий қарама-қаршилик даражасининг ошиши ва ядро урушига олиб келиши мумкин”, — деди Маломуж.
Унинг фикрича, агар НАТО урушга киришса, Россия ядровий стратегик ҳужум қуролларини жойлаштиришга ҳаракат қиларди. Дунё эса глобал инқироз ва бутун инсониятни йўқ қилиш хавфи ёқасида бўларди.
“Байден ва бошқа дунё етакчилари бу чизиқни жуда аниқ ҳис қилмоқда. Шунинг учун глобал ҳужум бўлмайди ва ҳозирда бундай сценарий ишлаб чиқилмаяпти. Россия НАТО давлатларидан бирига — Болтиқбўйи мамлакатлари, Польшага қарши ҳужум бошлаган тақдирда бу сценарий кўриб чиқилади. Бунда НАТОнинг кучли армияси Россия билан юзма-юз келади. Жараёнда НАТО Украинани қўллаб-қувватлаш мақсадида эмас, аксинча Россия агрессиясига жавобан урушга киради”, — деди Маломуж.
Мавзуга доир:
- НАТО адмирали алянс Россия билан тўғридан тўғри тўқнашувга тайёрлигини айтди
- Венгрия бош вазири НАТО қўшинлари Украинага юборилиши мумкинлигини айтди
