Генерал Пётр Павел Чехиянинг янги президенти этиб сайланди

Чехиядаги президентлик сайловларида истеъфодаги генерал, НАТО ҳарбий қўмитасининг собиқ раиси Пётр Павел ғалаба қозонди. 

Сайловнинг иккинчи босқичида 61 ёшли генерал ўз рақиби, собиқ бош вазир Андрей Бабишни мағлуб этди. Дастлабки натижаларга кўра, Павел 58 фоиздан кўпроқ овоз тўплаган. Сайловда овоз бериш ҳуқуқига эга аҳолининг қарийб 70 фоизи иштирок этган.

Пётр Павел президентлик сайловида биринчи марта қатнашаётган эди. У мустақил номзод сифатида сайловолди ташвиқотини олиб борди ва Чехия ҳукумати томонидан қўллаб-қувватланди. Кампания давомида Павел НАТО ва Европа Иттифоқини қўллаб-қувватлади. Шунингдек, у Украинага ёрдам бериш тарафдори эканлигини айтди.

Чехияда республика президенти асосан расмий тантанали функцияларни бажаради, лекин у бош вазир ва марказий банк раҳбарини ҳам тайинлайди, шунингдек, ҳукуматга сиёсий масалаларда босим ўтказиши мумкин.

Пётр Павел 9 март куни ўз лавозимига киришади ва сайловда Андрей Бабиш номзодини қўллаб-қувватлаган Милош Земаннинг ўрнига президент бўлади.

2013 йил мартдан буён мамлакатни бошқариб келаётган Чехиянинг амалдаги президенти Милош Земан Хитой билан, шунингдек, Россиянинг Украинага бостириб киришидан аввал ҳам Москва билан яқинроқ алоқалар ўрнатиш тарафдори эди. Пётр Павелнинг президент этиб сайланиши Чехия сиёсатида “кескин ўзгаришлардан далолат беради”, деб ёзмоқда Reuters.