“Human.uz” нашри директори Хуршид Далиев ва бош муҳаррири Муслим Мирзажонов ва сайтнинг бошқа ходимлари қўлга олинганди. ДХХ қўлга олинган журналистларга жиноят иши қўзғатилганини маълум қилди.
Қайд этилишича, фуқаро I.А.дан келиб тушган мурожаатга асосан, Хуршид Далиев ва бошқалар Telegramъдаги “Компроматузб” ҳамда бошқа каналлар орқали амалга оширилган жиноятларга алоқадорлиги сабабли қўлга олинган.
Уларга нисбатан Жиноят кодексининг 165-моддаси (товламачилик) 2-қисми “в” банди билан жиноят иши қўзғатилган ва ҳозирда дастлабки тергов ҳаракатлари олиб борилмоқда. Тергов давомида просесс иштирокчилари адвокат билан таъминланган.
Маълумот ўрнида, 165-модда 2-қисми “в” банди: бир гуруҳ шахслар томонидан олдиндан тил бириктириб содир этилган бўлса, беш йилдан ўн йилгача озодликдан маҳрум қилиш билан жазоланади.
“Тергов жараёнларини олиб боришда уларнинг қонун билан белгиланган ҳуқуқ ва эркинликлари таъминланиши кафолатланади. Ушбу жараён билан боғлиқ маълумотлар доимий равишда эълон қилиниб борилади”, — дейилади баёнотда.
27 январь куни “Human.uz” нашри директори Хуршид Далиев ва бош муҳаррири Муслим Мирзажонов ва сайтнинг бошқа ходимлари қўлга олингани ҳақида хабар берилганди.
Миллий масс-медиани қўллаб-қувватлаш ва ривожлантириш жамоат фонди ушбу нашр журналистларининг қўлга олиниши билан боғлиқ вазиятдан хавотирда эканлигини билдирган.
Ахборот ва оммавий коммуникасиялар агентлиги эса ҳуқуқни муҳофаза қилувчи органлар ва Рақамли технологиялар вазирлигига тегишли сўровларни юборган. Вазирлик “Human.uz” веб-сайти блокланмаганини маълум қилган.
Изоҳ (0)