“Human.uz” нашри директори Хуршид Далиев ва бош муҳаррири Муслим Мирзажонов ва сайтнинг бошқа ходимлари қўлга олинди. Бу ҳақда нашр 27 январь куни ўзининг Telegram каналида хабар берди.
Хуршид Далиев (ўртада) ва Муслим Мирзажонов (ўнгда).
Унда айтилишича, шу куни соат 10:00 атрофида улар “Human.uz” сайтининг Тошкент давлат аграр университети ҳудудида жойлашган офисидан ўзини “орган ходимлари” деб таништирган инсонлар томонидан олиб кетилган. “Орган ходимлари” томонидан офисдаги эшиклар бузиб кирилган ва айни дамда барча маълумотлар, қурилмалар тинтув қилинмоқда.
Сайт таҳририяти “тўсатдан ва огоҳлантиришларсиз” олиб кетилган барча инсонлар саломатлиги ва ҳолатидан ҳавотир билдирган. Хабарда айтилишича, уларнинг ҳеч бирига алоқага чиқишнинг имкони бўлмаяпти.
Нашрнинг маълум қилинишича, сайтнинг ўзи ҳам блокланган.
Миллий масс-медиани қўллаб-қувватлаш ва ривожлантириш жамоат фонди ушбу нашр журналистларининг қўлга олиниши билан боғлиқ вазиятдан хавотирда эканлигини билдирди.
“Ҳуқуқ-тартибот идоралари томонидан ушбу масала бўйича изоҳ берилишини кутамиз ҳамда журналистлар хавфсизлиги, шуниндек, уларнинг профессионал фаолиятига қонуний муносабатда бўлиниши таъминланишини сўраймиз”, — дейилади фонд матбуот хизмати ахборотида.
Ҳозирча бу ҳақда ҳуқуқни муҳофаза қилувчи органлари томонидан расмий маълумот берилмади.
Изоҳ (0)