“Толибон” Ўзбекистонни яна электр энергияси бўйича ваъдани бажармаганликда айблади

Афғонистон миллий электр компанияси (Да Afghanistan Breshna Шеркат – DABS) Ўзбекистон Афғонистонга электр энергияси экспорти бўйича шартномага содиқ қолмагани, 250 мегаватт ўрнига 100 мегаватт электр энергияси етказиб берганини маълум қилди. Бу ҳақда Толо News хабар берди.

DABS раҳбари Ҳикматулла Охундзоданинг айтишича, бу миқдорда электр энергияси Афғонистондаги электр билан боғлиқ муаммоларини ҳал қилмайди. 

“Афсуски, Ўзбекистон ваъдаларига қарамай, бу келишувга амал қилмади ва Кобулга атиги 100 мегаватт қувват экспорт қилмоқда, бу миқдор бизнинг муаммомизни ҳал қилмаяпти”, — дейди “Толибон” расмийси.

Кобул Саноат ва тоғ-кон палатаси электр тақчиллиги сабабли уларнинг 90 фоизи фаолияти тўхтатилганини таъкидламоқда. 

“Кобул саноат парклари электр таъминотисиз қолганига 20 кун бўлди. Ишлаб чиқариш тармоқларининг 90 фоизи тўхтатилди. Умид қиламанки, Ўзбекистонда мавжуд бўлган техник муаммолар Афғонистон ва Ўзбекистон ўртасида тез орада ҳал қилинади”, — деди палата раҳбари ўринбосари Сахи Аҳмад Пайман.

DABS собиқ раҳбари Омонулла Ғолибнинг айтишича, DABS Туркманистондан 500 киловатт электр энергияси олиш устида ишлаши керак.

“500 киловаттлик кабел Пули Хумри орқали ўтаётганди ва Осиё тараққиёт банки томонидан қўллаб-қувватланганди. Аммо Осиё тараққиёт банкининг лойиҳалари тўхтатилган. Ягона ечим шуки, хусусий сектор ёки DABS сармоя киритиб, лойиҳани якунлаши керак”, — деди Ғолиб.

22 январь куни “Толибон” Афғонистондаги электр энергияси тақчиллиги сабабли Ўзбекистонга мурожаат қилиб, электр энергияси бўйича шартномага мувофиқ ўз ваъдаларини бажаришга чақирганди.

23 январь куни Ўзбекистон Энергетика вазирлиги Афғонистонга электр энергиясини етказиб бериш қайта тикланиши режалаштирилаётганини эълон қилди.