Украинага босқиндан деярли бир йил ўтиб, Владимир Путин янги ҳужумга тайёргарлик кўрмоқда. У Россияни АҚШ ва унинг иттифоқчилари билан узоқ йиллар давом этиши кутилаётган можарога тайёрламоқда, дея хабар берди Bloomberg.
Нашрда келтирилишича, Кремл ўз кучлари бир неча ойлик мавқеини бой берганидан кейин ташаббусни қайтариб олиши мумкинлигини намойиш қилмоқчи. Россия кучларининг фронтда доимий муваффақиятсизликка учрагани ва муҳим инсон ресурсларини йўқотиши Кремлдаги кўпчиликни ўзларининг амбицияларига реал қарашга ундагани, ҳатто ҳозирги фронт чизиғини ушлаб туриш ҳам ютуқ бўлиши таъкидланади.
“Аммо Путин Россия урушдаги йўқотишларга ва муваффақиятсизликларга қарамай ғалаба қозонишга ишончи комил”, — дейди Bloomberg.
Кремлга яқин одамларнинг фикрича, янги ҳужум февраль ёки март ойларида бошланиши мумкин. Уларнинг изоҳлари Украина ва унинг иттифоқчилари Россиянинг янги ҳужуми яқинлашаётгани ҳақидаги огоҳлантиришини тасдиқлайди. Бу Украина Америка ва Европа жанговар танкларининг ваъда қилинган захираларини олишидан олдин бошланиши мумкинлигини кўрсатади.
“Путин ишлар қандай кетаётганидан ҳафсаласи пир бўлди, лекин у ўз мақсадларидан воз кечишга тайёр эмас. Бу кўп қон тўкилиши ва ҳамма учун ёмонроқ бўлишини англатади”, — деди сиёсий маслаҳатчи Татяна Становая.
АҚШ ва Европа разведкаси расмийлари, ҳатто ўтган йилнинг кузида қўшимча 300 минг аскарни сафарбар қилганидан кейин ҳам Россияда янги ҳужум учун ресурслар борми, деган савол туғилишини билдирди.
Айни пайтда Украина иттифоқчилари қурол-яроғ етказиб беришни кучайтириб, биринчи марта зирҳли техника ва асосий жанговар танкларни етказиб беришга ҳозирлик кўрмоқда, бу эса Украина кучларига Россия позицияларини ёриб ўтишга ёрдам беради.
“Аммо Россиянинг Бахмут каби чекланган стратегик аҳамиятга эга бўлган жойларга ҳужуми Украина кучларини чарчатиб, бошқа жойга йўналтирди ва Киевнинг бошқа жойларда ҳужум операцияларини ўтказиш қобилиятига путур етказди”, — дейилади мақолада.
Ёз ва кузда Украина қўшинларининг Россия мудофаа чизиғини кесиб ўтган чақмоқ ҳужумларидан сўнг, Россия дронларнинг ҳар қандай потенсиал олдинга силжишини секинлаштириш учун мудофаани кучайтирди. Кремл ҳозирча кейинги сафарбарлик режаси йўқлигини таъкидлаган.
“Узоқ муддатли истиқболда Путин келгуси бир неча йил ичида қуролли кучларни деярли 50 фоизга кенгайтириш, Финляндия яқинида ва Украинанинг вақтинча босиб олинган ҳудудларида янги кучларни жойлаштириш режаларини тасдиқлади. Мактаб ва олий ўқув юртларида сўнгги марта Совет Иттифоқи даврида ўтказилган ҳарбий тайёргарлик курслари тикланмоқда”, — дейди Блоомебрг.
Таъкидланишича, АҚШ ва Европа ҳарбий амалдорлари можаро тез орада Биринчи Жаҳон уруши услубидаги жанговар тўқнашувларга айланиб кетишидан қўрқмоқда.
Мавзуга доир:
Изоҳ (0)