Norvegiya Qurolli kuchlari qo‘mondoni general Eirik Kristoffersen Norvegiyaning TV2 telekanaliga bergan intervyusida Rossiyaning Ukrainaga keng ko‘lamli bosqini davomida 180 mingga yaqin rus askari halok bo‘lgan yoki yaralanganini aytdi.
Norvegiya generalining so‘zlariga ko‘ra, Ukrainaning urushdagi yo‘qotishlari “100 mingdan ortiq qurbon va yarador askarlarni tashkil etadi”. Uning qayd etishicha, yana 30 mingga yaqin ukrainalik tinch aholi halok bo‘lgan.
Rossiya Mudofaa vazirligi oxirgi marta 2022-yil sentabrda o‘z yo‘qotishlari haqida xabar bergandi. O‘sha paytda, Rossiya mudofaa vaziri Sergey Shoygu urushda 5 937 nafar rus qo‘shini halok bo‘lganini aytgan.
“Mediazona”, BBC rus xizmati va ko‘ngillilarning aniqlashicha, Rossiyada 17-yanvargacha, ochiq manbalarga ko‘ra, Ukrainaga bosqinda qatnashgan 11 662 nafar rossiyalik askarning o‘limi tasdiqlangan.
Ukraina Qurolli kuchlari Bosh shtabi 23-yanvar kungi hisobotida Rossiya bosqinida 121 mingdan ortiq rus askari halok bo‘lganini ma’lum qildi. 2022-yil dekabrda Ukraina prezidenti ofisi urush boshlanganidan beri 10 mingdan 13 minggacha ukrainalik harbiy halok bo‘lganini xabar qilgandi.
Izoh (0)