Россия президенти матбуот котиби Дмитрий Песков Владимир Путиннинг навбатдаги сайловларда иштирок этиши мумкинлиги ҳақидаги саволга жавоб берди. Бу ҳақда «РИА Новости» хабар берди.
Песковнинг сўзларига кўра, президент бу борада ҳеч қандай баёнот бермаган, у одатдагидек тартибда ишламоқда. Кремль расмийси Россия Марказий сайлов комиссиясининг (МСК) президентлик сайлови кампанияси бошланишига ҳозирданоқ тайёргарлик кўраётгани ҳақидаги хабарга ҳам изоҳ берган.
«Бу иш жараёни, МСК ўз вазифаларини бажармоқда. Ҳали Кремлнинг президентлик сайловларига тайёргарлик бошлангани ҳақида гапиришга эрта, ташвиқот бошланмади. Кремлда жуда кўп долзарб ишлар бор, кўряпсиз, президентнинг иш графиги фаол», — деди Песков.
Путиннинг навбатдаги президентлик сайловларида иштирок этиш тўғрисида ҳали қарор қабул қилмаган деб ҳисоблаш мумкинми, деган саволга Песков президент томонидан бу борада ҳеч қандай баёнот берилмаганини айтди.
«Президент бу борада ҳеч қандай баёнот бергани йўқ. Ҳозирча, яна бир бор такрорлайман, президентнинг одатий кун тартиби доирасида иш давом этмоқда», — деди у.
Россияда президентлик сайловлари 2024 йил 17 мартда бўлиб ўтади. Бундан аввал, 2018 йил 7 май куни Владимир Путиннинг тўртинчи президентлик муддати бошланганди.
2020 йилда Россия конституциясига киритилган тузатишларга мувофиқ 2024 йилда Путин яна президентлик учун номзодини қўйиши мумкин. 2021 йил октябрь ойида CNBC билан интервьюда Россия раҳбари келгуси сайловларда иштирок этиш бўйича ҳали бир қарорга келмаганини айтганди.
Изоҳ (0)