Янги Зеландия таълим вазири Крис Хипкинс ҳукмрон Лейбористлар партияси томонидан мамлакатнинг 41-бош вазири этиб сайланди.
22 январь куни Хипкинс ҳукмрон Лейбористлар партиясининг янги раҳбари лавозимига сайланди. У аввалги бош вазир Жасинда Ардерннинг ўрнига ҳукуматни бошқаради.
Крис Хипкинс Ардерндан кейин Лейбористлар партияси етакчилиги учун ягона номзод эди.
Дунёдаги энг ёш аёл раҳбарлардан бири Жасинда Ардерн беш йиллик фаолиятидан кейин ўз лавозимини тарк этишга қарор қилганди. У катта масъулиятдан чарчаганини ва бу лавозимга қайта сайланиш нияти йўқлигини айтган.
«Мен учун вақт келди. Яна тўрт йилга кучим етмайди. Бу ҳаётимдаги энг мазмунли беш ярим йил бўлди. Кетишимга сабаб шуки, бундай ўзига хос иш катта масъулиятни юклайди. Бу шундай масъулиятки, етакчи ролига айни пайтда муносибмисан, йўқми — билиб туришинг керак», — деди у ўзининг Лейбористлар партияси аъзоларига қарата, шу билан у ўз истеъфоси ортида ҳеч қандай яширин можаро йўқлигини билдирди.
Ардерн 2017 йилда 37 ёшида ҳукумат раҳбари этиб сайланган эди — у дунёдаги энг ёш аёл раҳбарлардан, шунингдек, ўз лавозимида ишлаётиб фарзандли бўлган камдан-кам юқори мансабдорлардан бири.
Ардерн уч йил давом этган коронавирус пандемияси чоғида Янги Зеландияни бошқарган бўлиб, унинг инқирозни енгиб ўтиш бўйича хатти-ҳаракатлари халқаро ҳамжамият мақтовига сазовор бўлди.
Изоҳ (0)