Суриянинг Алеппо шаҳри Шайх Мақсуд туманида 30 га яқин одам истиқомат қиладиган беш қаватли бино қулаб тушди. Бу ҳақда Daily Sabah хабар берди.
Маҳаллий полиция маълумотларига кўра, бино қулашига «турар жой пойдеворига сув сизиб чиқиши» сабаб бўлган. Ўнлаб ўт ўчирувчилар, қутқарувчилар вайроналар остида қолган одамларни бульдозер ёрдамида қидирмоқда. Ҳодиса оқибатида камида 10 киши, жумладан бир бола ҳалок бўлган.
Маҳаллий ахборот агентлиги етти киши ҳалок бўлгани, уч киши яраланганини хабар қилди. Улардан икки нафарининг аҳволи оғир экани таъкидланган. Суриядаги 11 йиллик тўқнашуви давомида Алепподаги кўплаб бинолар вайрон бўлган ёки зарар кўрган.
Аввалроқ Россиянинг Сахалин оролида беш қаватли турар жой биноси портлаб кетиши оқибатида етти киши ҳалок бўлгани, уларнинг уч нафари болалар экани маълум қилинган. Портлашга газ баллони сабаб бўлган, уйнинг вайрон бўлган подъездида жами 33 киши яшаган.
Изоҳ (0)