Форс кўрфазидаги араб мамлакатлари ва Туркия Ташқи ишлар вазирликлари Швеция пойтахти Стокгольмдаги Туркия элчихонаси ёнида Қуръон китобининг ёқиб юборилишини қоралади.
Nordic News хабар беришича, Швециянинг ултра ўнгчи «Қаттиқ келишув» партияси раҳбари Расмус Палудан Стокгольмдаги Туркия элчихонаси олдида Қуръонни ёқиш митингини ўтказишга рухсат олган. Палудан акцияни 21 январь куни ўтказди. Туркия Ташқи ишлар вазирлиги Қуръоннинг ёқилишини Европада исломофобия, ирқчилик ва дискриминациянинг қай даражада эканини кўрсатади, деб таъкидлади.
Ўша куни Швецияда Туркияга қарши янги намойишлар ҳам бўлиб ўтди. Стокгольм Анқарадан мамлакатнинг НАТОга киришига тўсиқ бўлмасликни сўрамоқда, Туркия эса террорчи деб атаган курд фаолларини топширишни талаб қилмоқда. Бўлаётган воқеалар фонида Анқара Швеция мудофаа вазирининг Туркияга ташрифини бекор қилди.
Саудия Арабистони Ташқи ишлар вазирлиги Швецияда мусулмонлар учун муқаддас китобни ёқиш бўйича амалга оширилган ҳаракатни кескин қоралашини маълум қилди.
«Қироллик мулоқот, бағрикенглик ва тинч-тотув яшаш қадриятларини ёйиш ҳамда нафрат ва экстремизмдан воз кечиш муҳимлиги ҳақидаги қатъий позициясини тасдиқлайди», — дейилади вазирлик баёнотида.
Кувайт Ташқи ишлар вазирлиги бу каби ҳаракатлар «дунё мусулмонлари орасида ғазабга сабаб бўлиши ва хавфли провокацияга айланиши мумкинлиги» ҳақида огоҳлантирди.
Бирлашган Араб Амирликлари Ташқи ишлар вазирлиги «диний рамзларни ҳурмат қилиш, динлар ва уларнинг зиёратгоҳларини ҳақорат қилишдан тийилиш»га чақирди.