Самарқандда келин-куёвнинг ўлими юзасидан хизмат текшируви тайинланди

Самарқанд вилояти Каттақўрғон туманида келин-куёв ис газидан вафот этганди. Бош прокуратура ҳолат юзасидан қўшимча маълумот берди.

Аниқланишича, 16 январь куни Олтинсой қишлоғида яшаган 26 ёшли эркак ва унинг 18 ёшли турмуш ўртоғи яшаш хонадонида ис газидан заҳарланиб вафот этган.

Шу куни марҳумлар яқин қариндошлари томонидан дафн этилган. Бироқ Каттақўрғон тумани ИИБ ва тиббиёт бирлашмасига ҳам келин-куёв вафот этганликлари ҳақида хабар келиб тушмаган.

Каттақўрғон тумани ИИБ ва тиббиёт бирлашмасига ҳам келин-куёв вафот этгани ҳақида хабар келиб тушмаган. Марҳумларнинг яқинлари ушбу ҳолат ҳақида ички ишлар органлари ва бошқа ташкилотларга хабар бермаганликлари аниқланган.

Текшириш давомида Каттақўрғон туман ИИБ, туман ҳокимлиги Маҳалла ва оилани қўллаб қувватлаш бўлими, туман Оила ва хотин қизлар бўлими ҳамда «Ҳудудгаз Самарқанд» корхонасига хизмат текширувлари тайинланган.

Каттақўрғон туман прокуратураси томонидан воқеа жойи кўздан кечирилиб, марҳумларнинг ўлим сабабларига аниқлик киритилмоқда. Текшириш ҳаракатлари давом этмоқда.