Ангрен шаҳар прокурори, шаҳарнинг иккинчи сектори раҳбари Улуғбек Хабилжонов мактаб ҳудуди қордан тозаланмагани ҳақида ижтимоий тармоқларда тарқалган видеоси бўйича изоҳ берди.
Прокурор сўзининг аввалида ўқитувчи ва мураббийларга чуқур ҳурмат сақлаган ҳолда улардан узр сўради.
Унинг айтишича, 18 январь куни шаҳар ҳудудидаги мактабларнинг ўқув йилига тайёргарлик ҳолатини ўрганиш мақсадида шаҳар тўртта сектор раҳбари билан мактабларда ўрганиш олиб борилди. 22-сон умумтаълим мактаби ҳудудига келишганида мактаб ҳудуди қорлардан тозаланмагани аниқланган.
«Ўқув жараёнида ўқитувчи ва ўқувчиларнинг соғлиғига хавф туғдиришини инобатга олиб, Telegram ижтимоий тармоғида маъмуриятга мактабда тозалаш ишларига масъул ишчилар ҳам ишни бажармаганини билдириб, буни бартараф қилиш лозимлигини айтганман.
Аслида мен мактаб ҳудудини ўқитувчи мураббийларимиз эмас, балки ушбу ишга масъул шахслар бажаришини ташкиллаштиришни сўраганман», — дейди Улуғбек Хабилжонов.
Прокурор ушбу ҳолатдан қаттиқ афсусдалигини билдириб, барча ўқитувчи ва мураббийлардан узр сўради.
Тошкент вилояти прокуратурасининг маълум қилишича, Ангрен шаҳар прокурори Улуғбек Хабилжоновга фаолиятида йўл қўйган хато ва камчиликлар учун интизомий жазо чораси қўлланди.
Изоҳ (0)