Ижтимоий тармоқларда Ангрен шаҳар прокурорининг ўқитувчилар яқинда дарслар бошланадиган мактаб йўлакларини қордан тозаламаганини танқид қилгани экс этган видео тарқалиб, муҳокамаларга сабаб бўлди. Мактабгача ва мактаб таълими вазирлиги ҳолатга муносабат билдирди.
Видеода прокурор «Мана, умуман тозаланмаган. Ўқитувчилариям йўқ, ойлик олиб ётишибди бекордан-бекор», — деб айтган ва тозаланмаган йўлларни кўрсатган.
Мактабгача ва мактаб таълими вазирлиги педагог ходимларни хизмат мажбурияти билан боғлиқ бўлмаган ишларга жалб қилиш тақиқланганини билдириб, тарқалган видеолавҳа Бош прокуратурага юборилгани ва ҳолат ҳозирда ўрганилаётганини маълум қилди.
«Жамиятда ўқитувчининг обрўсини оширишни ҳар биримиз ўзимиздан бошлашимиз лозим. Бу борада катталар ёшларга ўрнак бўлиши ва ҳар доим барчамизга билим берган устозларга ҳурмат билан муомалада бўлишимиз шарт», — дейилади муносабатда.
Вазирлик Шавкат Мирзиёев томонидан ўқитувчилар нуфузини ошириш борасида қатор топшириқлар берилгани ва «Ўқитувчини ҳурмат қилмаганни мен ҳам ҳурмат қилмайман» деган гапларини ҳам эслатиб ўтган.
« ‘Зўрлаб ишлатиш ёки мажбурий меҳнат тўғрисидаъги Конвенциянинг 6-моддасига асосан маъмурият амалдорлари, ҳатто уларнинг вазифаси уларга ишониб топширилган аҳолини қандайдир меҳнат шакли билан банд қилишга кўмаклашишдан иборат бўлса-да, ушбу аҳоли ёки алоҳида шахсларни хусусий шахслар, компаниялар ёки ташкилотлар учун ишлашга мажбур қилиши мумкин эмаслиги белгиланган.
Бундан ташқари, Вазирлар Маҳкамасининг ‘Ўзбекистон Республикасида мажбурий меҳнатга барҳам беришга доир қўшимча чора-тадбирлар тўғрисида’ 2018 йил 10 майдаги қарорига мувофиқ Бош прокуратурага Ўзбекистон ҳудудида мажбурий меҳнатга йўл қўймаслик соҳасидаги қонун ҳужжатларига риоя этилиши юзасидан назоратни кучайтириш, бу борадаги текширувлар самарадорлигини ошириш ва мажбурий меҳнат ҳолатлари аниқланганда эса айбдор шахсларга нисбатан тегишли жавобгарлик чораларини қўллаш тавсия этилганини эслатиб ўтамиз», — дейилади муносабатда.
Изоҳ (0)