Катталарнинг 80 фоизи эртами-кечми, бел оғриғини бошдан кечиради — қолган 20 фоиз таркибида бўлишга ҳаракат қилинг.
Бел оғриғи одам дуч келадиган барча турдаги оғриқ синдромларининг энг кенг тарқалганидир. Баъзи маълумотларга кўра, ёши катта эркак ва аёлларнинг 80 фоизи камида бир марта бўлса ҳам умуртқа поғонасининг турли қисмларидаги оғриқ ёки мушаклар оғриғини бошдан кечирган. Ачинарлиси шуки, кўп ҳолларда белимиздаги чидаб бўлмас даражадаги оғриқлар кейинчалик бирор касаллик ривожланишининг олдини олиш ёки таъсирини сезиларли камайтириш мумкинлигидан далолат эканини англаб етишга анча кеч бўлган бўлади. Текшириб кўринг, белга зарар бўлган кичик одатларни кунма-кун бажараётгандирсиз?
Жуда ҳам юмшоқ тўшакда ухлаш
Чиндан ҳам, матрас соғлиғингиз учун жуда муҳим рол ўйнайди. Матраснинг, айниқса, кексалар ёки ортиқча вазнли одамлар учун жуда қаттиқ бўлиши ярамайди. Аммо у жуда ҳам юмшоқ бўлмаслиги керак: акс ҳолда, умуртқа поғонаси етарли даражада ёрдам ололмайди. 2003 йилда The Lancet журналида чоп этилган тадқиқот шуни кўрсатдики, мунтазам юмшоқ тўшакда ухлаш умуртқа поғонаси касалликларининг ривожланиш хавфини икки баробар оширади.
Узоқ вақт телефонда гаплашиш
Бел учун сиз қила оладиган энг ёмон нарса — телефонда гаплашиш — қўл телефонни елкангиз ва қулоғингиз ўртасида ушлаб туришдир. Балки сиз бунинг учун қўлларингиздан фойдаланарсиз ҳам, бироқ суҳбат давомида сиз бошингизни бир ёнга эгиб, бир елкангизни кўтарган ҳолатда бўласиз. Натижада бўйин ва кўкрак умуртқа поғонасида мушакларнинг зўриқиши пайдо бўлади. Мушаклар ҳам ҳаддан ташқари кучланиши мумкин. Буларнинг барчаси умуртқа поғонаси фаолиятининг бузилишига олиб келишувчи сабаблардан биридир. Агар мобил телефонингизда тез-тез ва узоқ вақт гаплашишга тўғри келса, қулоқчин ёки мессенжерлардан фойдаланинг.
Ҳар хил уй ишлари
Кир ва идиш-товоқларни ювиш, дазмоллаш, чанг тозалаш — кундалик юмушларнинг барчаси бел учун ҳақиқатан ҳам, «ўлдирувчи» хусусиятга эга бўлган ишлардир. Улардан узоқлашиш имконсиз (гарчи, юкламалар барча оила аъзолари ўртасида тенг тақсимланган бўлса ҳам). Аммо белимизга бироз ёрдам бера оламиз. Агар тик турган ҳолда бирор-бир иш бажараётган бўлсангиз, даставвал икки елкангизни, сўнгра, умуртқа поғонасини тўғрилаб олинг. Тана вазнингизни бир оёққа туширманг. Шунингдек, тиззаларингизни букманг. Шунда камроқ чарчайсиз. Чунки юк умуртқа поғонаси бўйлаб тенг тақсимланади ва белингиз деярли зиён кўрмайди.
Баланд пошнали ёки «флип-флоп» оёқ кийимларни кийиш
Сир эмас, баланд пошнали пойабзалларнинг зарари ҳақида ҳамма билади. Олдингидан камроқ бўлса ҳам, уларни кийишда давом этмоқдалар. Баланд пошнада тананинг табиий шакли бузилади, белнинг қайрилиши ошади. Бундан ташқари, мушаклар ва бўғимлар учун қўшимча юк ҳосил қилади. Айни пайтда бел учун сиз қила оладиган энг яхши нарса — баланд пошнали туфлилардан воз кечиш ва қулай тагликка эга бўлган пойабзал кийишни одат қилишдир.
Яна бир хавфли пойабзал — бу «флип-флоп»лар яъни, товонсиз пойабзаллар ёки орқа тарафи маҳкамланмаган ҳар қандай оёқ кийимлар. Уларни мунтазам кийиб юриш сон ва белдаги мушакларга ҳаддан ортиқ юклама беради ва умуртқа поғонасига зиён келтиради.
Нотўғри овқатланиш
Ажабланарлиси, бизнинг овқатланишимиз тўғридан-тўғри белимиз мустаҳкамлиги билан боғлиқ: 2014 йилда Asian Spine Journal журналида чоп этилган тадқиқот шуни кўрсатдики, бел оғриғидан шикоят қилган ҳар учинчи аёл ва ҳар тўртинчи эркак ошқозон-ичак тракти билан боғлиқ муаммоларни бошдан кечирган бўлади. «Енгил» углеводлар ва шакарга бой диеталар, шунингдек, сабзавот ва дуккакли маҳсулотларнинг етишмаслиги организмда яллиғланиш жараёнларининг ривожланишига сабаб бўлади, шу жумладан, бел соҳасида ҳам.
Чекиш
Ҳа, агар сиз ҳали ҳам чекишни ташлаш учун сабабга муҳтож бўлсангиз, унда яна бир омил: доимий чекиш умуртқа поғонаси дискларининг қон билан таъминланишини бузади. Бу эса уларнинг эрта қаришига ва ҳалокатига олиб келади. Сиз чекадиган ҳар бир сигарет том маънода умуртқа поғонасини синдиради — балки, чекишни ташлаш вақти келгандир?
Мавзуга доир:
Изоҳ (0)