Путин ва Эрдўғон телефон орқали Россия ва Украина ўртасида асирлар билан айирбошлашувни муҳокама қилди

Россия ва Туркия президентлари телефон орқали суҳбатлашиб, Россия ва Украина ўртасида асирлар, «биринчи навбатда, ярадорлар» билан айирбошлашлаш масаласини ҳам муҳокама қилди. Бу ҳақда Кремль матбуот хизмати хабар бермоқда.

Шунингдек, Владимир Путин ва Ражаб Тоййиб Эрдўғон Туркияда минтақавий газ хабини яратиш, дон битимини амалга ошириш ҳақида гаплашди, ҳамда «Туркия-Сурия алоқаларини нормаллаштириш масалалари»ни муҳокама қилди.

«Владимир Путин қурол-яроғ ва ҳарбий техника етказиб бериш ҳажмини ошираётган ғарблик ҳомийлар кўмагида жанговар ҳаракатларни кучайтиришга умид боғлаган Киев режимининг деструктив жиҳатига эътибор қаратди. Киевнинг иккиюзламачилик сиёсатига православ Рождествоси даврида ўт очишни тўхтатиш таклифини қабул қилмагани мисол бўлди», — дейилади хабарда.

Туркия президенти матбуот хизмати баёнотида айтилишича, Эрдўғон Путинни унинг мамлакати Россия ва Украина ўртасида «мустаҳкам тинчлик» ўрнатиш учун воситачи ролини бажаришга тайёрлигига ишонтирган.

Туркияга, хусусан, сентябрда Мариуполдаги «Азовсталь» заводи мудофаасига қўмондонлик қилган украиналик ҳарбийлар келтирилганди. Россия томони ўшанда айирбошлашув доирасида, шу жумладан, Киев томонидан давлатга хиёнатда айбланувчи «Путиннинг қадрдони» Виктор Медведчукни қўлга киритган эди.

Туркия иштирокида июлда дон битими тузилган, у Қора денгиз портларидан Украина донини чиқариб кетиш имконини берганди.

Октябрда Россия президенти Владимир Путин аввал Евроиттифоққа «Шимолий оқим» газ қувури орқали етказиб берилган ёнилғини Туркия орқали, ушбу мамлакатда газ хабини яратган ҳолда қайта йўналтиришни таклиф қилди.