Украинадаги урушга ёлланган «Вагнер» собиқ қўмондони Андрей Медведев 12 январь куни Россия ҳудудини тарк этиб, Норвегия чегарасини ноқонуний кесиб ўтди. Бу ҳақда 15 январь куни ҳуқуқ ҳимоячиларининг «Gulagu.net» порталида хабар берилди.
Медведев Россиядан Мурманск вилоятидаги Никeл аҳоли пункти орқали чиқиб кетган ва Норвегияга боргач, ҳуқуқ-тартибот ходимларидан ҳимоя ва сиёсий бошпана сўраган. Шундан сўнг қочоқ маҳаллий аэропортдан қўриқлаш ҳамроҳлигида Ослога олиб кетилган ва у ерда миграция қонунчилигини бузувчилар марказига жойлаштирилган.
Андрей Медведев Россия–Норвегия чегарасини қандай кесиб ўтди?
Медведевга кўра, у оқ камуфляж халатида қочиб кетган. Россия чегарачилари уни Норвегия чегарасига 2 километр қолганда аниқлаб, унга қарата ўт очган ва хизмат итини унинг орқасидан қўйиб юборган.
«Мен музлаган кўлга томон югурдим, улар орқамдан югуришдан қўрқди, чунки муз жуда юпқа эди. Орқамдан итни қўйиб юборишди, лекин у симга ўралашиб қолди. Мен Норвегиядаги энг яқин аҳоли пунктигача югурдим», — дейди Медведев.
Норвегияга етиб келгач, Медведев дуч келган биринчи уйни тақиллатган. У эшикни очган уй эгасига инглиз тилида ёрдамга муҳтожлигини тушунтирган.
«У рози бўлди ва эшикни ёпди. Кейин йўл бўйлаб юриб, қишлоқдан 3 километр узоқлашдим. Норвегия чегарачилари ва полициячилар мени ушлаб олди», — дея давом этди Медведев.
Кейин у самолётда Ослодаги миграция марказига юборилган. Ҳозирда у ерда сиёсий бошпана бериш тўғрисидаги қарорни кутмоқда.
Андрей Медведев ҳақида нималар маълум?
«Gulagu.net» порталининг хабар беришича, Медведев «Вагнер» гуруҳи билан 2022 йилнинг 6 июлида 4 ойлик шартнома имзолаган. У ерда 7-штурм отрядининг 4-взвод 1-бўлими қўмондони бўлиб хизмат қилган. 2022 йил декабрь ойида Андрей Медведев ва унинг ўртоғи «Gulagu.net» таҳририятига мурожаат қилиб, суддан ташқари қатағон ва «Вагнерчилар»нинг ўлдирилишидан қочиш учун ёрдам сўраган.
Медведев хизмат давомида украиналикларга қарши жанг қилишдан бош тортган ёки хусусий ҳарбий компания сафини тарк этмоқчи бўлганларга қарши «Вагнер» асосчиси Евгений Пригожиннинг хавфсизлик хизмати қатлни амалга оширганини айтди.
Мавзуга доир:
Изоҳ (0)