Хитойда COVID-19 га қарши «нол бардошлилик» сиёсати бекор қилинганидан бери бир ой ичида 59 938 киши коронавирусдан вафот этди. Бу ҳақда Хитой Миллий соғлиқни сақлаш комиссияси (NHC) вакили Сзяо Яхуи Global Times нашрига маълум қилди.
Маълумотлар 8 декабрдан 12 январгача бўлган даврни ўз ичига олади. NHC маълумотларига кўра, 5,5 минг беморнинг ўлимига нафас етишмовчилиги сабаб бўлган, қолганлари коронавируснинг бошқа касалликлар билан қўшма таъсиридан вафот этган.
Қурбонларнинг ўртача ёши 80,3 ёшни ташкил этади, вафот этган ҳар ўн бемордан тўққизтаси 65 ёшдан ошган. Қишда қариялар орасида юрак-қон томир касалликларининг кучайиши ва нафас олиш йўллари касалликларининг кўпайиши туфайли улар орасида ўлим сони нисбатан юқори бўлади, деб тушунтирди Сзяо Яхуи.
Bloomberg таъкидлашича, Хитой расмий идорасининг маълумотлари билан COVID-19 дан вафот этганларнинг ҳақиқий сонини тасдиқлаб бўлмайди, чунки декабрь ойида расмийлар кундалик статистик маълумотларни эълон қилишни тўхтатганди.
«Нол бардошлилик» даврида Хитойда ҳар бир коронавирус эпидемияси локдаун ва қаттиқ чекловлар орқали бостирилганди. Бу Пекинда 2020 йилдан бери амал қилиб келди. Намойишлардан сўнг Миллий соғлиқни сақлаш комиссияси декабрь ойи бошида чекловларни юмшатишга рози бўлди.
Чораларнинг кескин бекор қилиниши касалликнинг янгидан авж олишига олиб келди: декабрь ойида Хитойда деярли 250 миллион киши COVID-19 билан касалланган, деб хабар беради Bloomberg. Расмий статистик маълумотлар бу рақамларни тасдиқламади, январь ойининг ўрталарига қадар Пекин Хитойда пандемия даврида атиги 5 241 киши ўлганини хабар қилди.
Изоҳ (0)