Россия қўшинлари Украинага киритилганига бир йил тўладиган кунда — 2023 йил 24 февраль куни Украина президенти Владимир Зеленский БМТ Бош ассамблеяси мажлисида нутқ сўзлаш учун Нью-Йоркка келишни режалаштирмоқда. Бу ҳақда Associated Press Украина Ташқи ишлар вазирлигига таяниб хабар бермоқда.
«Президентимиз боришни хоҳларди, унда бориш учун истак ва ният бор… бироқ хавфсизлик билан боғлиқ вазият унга бориш имкониятини бериш-бермаслиги масаласи ҳам бор», — деди Украина ташқи ишлар вазири биринчи ўринбосари Эмине Жапарова.
Дипломат қайд этишича, Украина разведкаси маълумотларига кўра, февралда Россия «жуда жиддий ҳужум»ни режалаштирмоқда. Бу омил президент ташрифини режалаштиришни қийинлаштирмоқда.
22 декабрь куни Владимир Зеленский Вашингтонда АҚШ президенти Жо Байден билан кўришиб, Конгрессда чиқиш қилганди. Ўшанда у 2022 йил 24 февралида Украинада жанговар ҳаракатлар бошланганидан буён биринчи марта мамлакатни тарк этганди.
Аввалроқ 2023 йилда «Катта еттилик» давлатлари (G7) раиси мақомини оладиган Япония Украина президенти Владимир Зеленскийни G7 саммитида онлайн форматда иштирок этишга таклиф қилмоқчилиги хабар берилганди. Учрашув Хиросимада 19—21 май кунлари бўлиб ўтади.
Изоҳ (0)