Илгари Апп Анние номи билан танилган Дата.аи тадқиқот компанияси ҳисоботида айтилишича, мобил ўйин фойдаланувчилари 2022 йилда илова ичидаги харажатларини 5 фоизга қисқартирди. Бу ҳақда «Интерфакс» хабар бермоқда.
Ҳисоботга кўра, харажатларнинг камайишига юқори инфляция сабаб бўлган.
Компанияга кўра, мобил ўйинлар харидларининг умумий ҳажми 110 миллиард долларни ташкил этган. 2023 йилда бу кўрсаткич яна 3 фоизга камайиб, 107 миллиард долларга тушиши мумкин.
Шу билан бирга, ўйинлар билан иловаларни ўрнатиш сони янги рекордга етган — 90 миллиард, ўтган йилга нисбатан 8 фоизга кўп.
«Одамлар нарх-навога кўпроқ эътибор қаратмоқда ва молиявий жиҳатдан анча консерватив бўла бошлади», — дейди Дата.аи тадқиқот бўлими раҳбари Лекси Сидоу.
Унинг қўшимча қилишича, ўйин сегменти ҳар қандай бошқа турдаги мобил иловаларга қараганда харажатларни камайтиришдан кўпроқ зарар кўрган.
Ўйинга оид бўлмаган иловаларнинг харажатлари 2022 йилда 6 фоизга ошиб, 58 миллиард долларга етди. Ўсишнинг катта қисми стриминг платформалари, танишув иловалари ва қисқа видео хизматлари, жумладан TikTok ҳисобига тўғри келди. Ўйин учун мўлжалланмаган мобил иловаларни юклаб олиш 13 фоизга ошиб, 165 миллиардга етди.
Изоҳ (0)