Европа Иттифоқи водород ишлаб чиқариш технологиялари бўйича АҚШни ортда қолдирди

Халқаро энергетика агентлиги (IEA) ва Европа патент идораси (EPO) водород ишлаб чиқариш ва улардан фойдаланиш соҳасидаги янги технологиялар, ишланмалар ва патентлар бўйича қўшма тадқиқотни эълон қилди. Бу ҳақда “Коммерсант” хабар бермоқда.

Маълум бўлишича, сўнгги ўн йил ичида Европа Иттифоқи (ЕИ) ва Япония ўз технологияларини ишлаб чиқиш бўйича Америка Қўшма Штатларини ортда қолдириб, уларга тегишли патентларни олган.

Европа давлатлари орасида патентлар сони бўйича Германия, Франция ва Нидерландия етакчилик қилмоқда.

IEA ва EPO томонидан эълон қилинган қўшма ҳисоботга кўра, Европа Иттифоқи ва Япония водород технологияси соҳасидаги янги ишланмалар учун берилган патентлар сони бўйича етакчи бўлди.

2011 йилдан 2020 йилгача Европа Иттифоқи мамлакатлари ушбу соҳадаги барча халқаро патент оилаларининг (IPF) 28 фоизини олди.

Япония худди шу даврда водород технологиялари учун барча IPFларнинг 24 фоизини чиқарди. АҚШ 20 фоиз билан учинчи ўринни эгаллади ва бу мамлакат ўрганилаётган даврда янги водород технологиялари учун берилган патентлар сони камайди.

Шунингдек, етакчилар қаторида Жанубий Корея (халқаро патентлар умумий сонининг 7 фоизи), Хитой (4 фоиз), Буюк Британия (3 фоиз) ва Канада (2 фоиз) каби давлатлар бор.

Европа Иттифоқи мамлакатлари ичида Германия янги водород технологияларини ишлаб чиқишда энг фаол ҳисобланади — олинган патентлар глобал сонининг 11 фоизи.

Иккинчи ўринда Франция (8 фоиз), учинчи ўринда Нидерландия (3 фоиз). Бошқа барча Европа Иттифоқи мамлакатлари жами 8 фоиз IPF олди.

Водород ишлаб чиқаришнинг янги технологияларида етакчи бўлган тармоқлар орасида автомобилсозлик ва кимё саноати бор.

Университетлар ва илмий-тадқиқот ташкилотлари ҳам жуда самарали ишлайди: улар патентларнинг умумий сонининг 13 фоизини олди.

Тадқиқотда айтилишича, водород лойиҳаларига киритилган 10 миллиард долларлик венчур сармоясининг ярмидан кўпи мавжуд патентларга эга бўлган стартапларга кетган.

Инвестицияларнинг 80 фоиздан ортиғи электролиз, ёнилғи ҳужайраларини ишлаб чиқиш ва водород қазиб олишнинг кам эмиссия усуллари каби соҳаларда патент олган ёки олиш жараёнида бўлган стартаплар томонидан жалб қилинган.