Украина пойтахти Киевдаги Шевченко боғида «бузилмас ўтов» — шаҳарда электр таъминоти узилиб қолганда одамлар исиниши, чой ичиши ва уяли телефонларини зарядлаб олиши мумкин бўлган пункт очилди.
Ўтовни ўрнатиш маҳаллий қозоқ диаспорасининг кўнгиллилари томонидан амалга оширилмоқда. Расмий равишда ўтов 14 январь куни очилади ва Украинада қиш аёзи тугагунча ишлайди.
6 январь куни худди шундай ўтов Киев вилоятининг Буча шаҳрида пайдо бўлганди — бу шаҳарда Россия истилоси пайтида юзлаб тинч аҳоли ҳалок бўлган.
«Украине сейчас» Telegram-каналининг мухбири билан суҳбатда кўнгиллилар уларнинг ташаббуси билан Украинанинг олтита шаҳрида — Буча ва Киевдан ташқари, Львов, Одесса, Харьков ва Черкассида ҳам «бузилмас ўтов»лар пайдо бўлишини айтди.
Аввалроқ Бучанск шаҳар кенгаши вакиллари Бучадаги ўтов Қозоғистон элчихонаси ва Олий Рада депутати Сергей Нагорняк кўмагида очилгани ҳақида хабар берганди. Кейин Ташқи ишлар вазирлиги расмий вакили Мария Захарова Остонадан республиканинг Бучада ўтов ўрнатишга алоқаси йўқлиги ҳақида кафолат олганини маълум қилганди. Шу билан бирга, у «муҳокамаларга чек қўйиш» учун Қозоғистон ТИВ ушбу мавзу бўйича расмий изоҳ бериши мақсадга мувофиқ бўлишини таъкидлади.
Қозоғистон Ташқи ишлар вазирлиги вакили Айбек Смадияров қурилишни элчихона иштирокисиз қозоғистонлик ҳомийлар молиялаштирганини маълум қилди.
Изоҳ (0)