Apple 2025 йилда сенсор экранли MacBook’ни ишлаб чиқариши мумкин. Бу ҳақда компаниядаги манбаларга таяниб, Bloomberg хабар берди.
Маc’да iPhone ва iPad дастурларини ишга тушириш имконияти узоқ вақтдан бери муҳокама қилинмоқда. Сенсорли экран гаджетларнинг ўзаро интеграциялашувини тезлаштириши мумкин. Ҳозир муҳандислар Apple ноутбукларига сенсорли интерфейсни ўрнатиш устида тажриба ўтказмоқда.
Apple 10 йилдан ортиқ вақт давомида ноутбукларда сенсорли экранлар яхши ишламаслиги, сенсорли интерфейс керак бўлса, iPad энг яхши вариант эканини таъкидлаб келган. Бундан ташқари, компания сенсор экранли Маc компьютерлари iPad сотувини қисқартиришидан хавотирда.
«Сенсорли юзалар вертикал бўлишини исташмайди. Узоқ вақт давомида фойдаланишдан сўнг қўлингиз оғриши мумкин», — деб тушунтирган Стив Жобс.
Apple компаниясининг биринчи сенсор экранли ноутбуклари 2025 йилда MacBook Pro янгиланиши доирасида сотувга чиқарилиши мумкин. Бироқ, якуний қарор ҳали қабул қилинмаган ва бу ўзгариши мумкин. Шунингдек, компания дисплейларини суюқ кристалл LCD дисплейлар ўрнига OLED технологиясига ўтказишни режалаштираётгани ҳам айтилмоқда.
Apple: сўнгги янгиликлар
Bloomberg таҳлилчиси ва муҳаррири Марк Гурманнинг сўзларига кўра, Apple’нинг янги тақдимоти март ойида бўлиб ўтади. Унда янги MacBook Pro 14 ва 16 дюймли дизайнларда ва эҳтимол 15,5 дюймли MacBook Air намойиш этилади.
Изоҳ (0)